50 ka balay sa Mahiga giguba

CEBU, Philippines - Dul-an sa 50 ka mga balay   nga nahimutang sa sapa sa Mahiga creek, sa Philcadan, sa  syudad sa Mandaue  gipangguba sa demolition team  kagahapon  sa hapon.

Ang  demolisyon  nahimo  luyo  sa  mga  pagbabag  sa  mga  apektado  nga  mga  molupyo  nga  gipangunahan  sa  ilang  representante  nga si  Roberto Letaba  nga  nangita  og  court order  kagahapon  sa buntag.

Matud pa ni Letaba nga ang kaso sa luna nga ilang gitukoran karon anaa pa sa korte hinungdan nga ang kamandoan lang sa korte ang ilang sundon ug wala nay lain pa.

Apan si Cynthia Suico, sa kagamhanan sa syudad sa Mandaue mibutyag nga igo lang sila nga miadto sa lugar aron ipatuman ang demolisyon  ug kagahapon  sa ala 1:00  sa hapon  nahinayon  gyud  ang  pagpangguba human  mopagawas  og  order  si Mayor  Jonas  Cortes sa  pagpaguba  gyud  sa  mga  balay  nga  milapas  sa balaod  bahin  sa 3 meter easement zone.

Usa sa mga residente nga si Vilma Morales, mibutyag nga andam sila nga mohawa sa maong lugar tungod kay mao may kamandoan sa mayor .

Si Supt. Crisaleo Tolentino  kinsa maoy  nag-supervise sa maong demolition mibutyag usab nga adunay mga sakop sa Special Weapons and Tactics (SWAT), kabomberohan ug kapolisan   nga  nagpatunhay  sa kalinaw ug kahapsay atol sa  pagpangguba  sa kabalayan.

Gibutyag usab ni Tolentino nga wala hinuon nagmagahi ang ubang mga molupyo  ilabi  na  dihang  nadawat  nila  ang  mando  sa mayor.

Karong  adlawa  ipadayon  pa  ang  maong  demolisyon. (BANAT NEWS)