Magtiayon gipamatay

CEBU, Philippines - Gituohang gitulis ug gipatay ang magtiayong lolo ug lola nga napalgan na lang nga pulos wala nay kinabuhi sulod sa ilang pinuy-anan sa sitio Lower Sangi sa barangay Guadalupe, siyudad sa Carcar niadtong Domingo sa alas 4:15 sa hapon.

Ang mga biktima mao sila si Dolores Neri, 82, ug bana niining si Renerio Neri, 83, nga nagpuyo sa maong lugar nga sila rang duha.

Matud ni PO2 Abelardo Beton sa Carcar City Police Station dihang nahinabi sa Banat News nga ang silingan sa magtiayon nga si Gloria Alfafara nga nakaagi duol sa balay sa duha maoy nakadiskubre sa nahitabo sa magtiayon.

Nahibulong si Alfafara nganong bisan alas-8 na sa buntag nagsiga gihapon ang suga sa sala sa duha maong nagpakuyog kini nianang pagkahapon sa silingang si Ismael Aldibera aron bisitahon ang magtiayon nga pipila ka adlaw na nilang wala makita.

Nakugang na lang sila tungod sa dili masingong baho sa sulod sa balay ug sa ilang pagsusi nagbuy-od na sa sulod ang magtiayon ug wala nay mga kinabuhi ug dunay mga samad sa lawas ug nagkatag usab  ang ilang mga butang sa sulod. Sa pagsusi sa kapolisan sa mga patay’ng lawas pulos kini nakaangkon og mga samad pinusilan sa kalawasan nga gituohang maoy nakaingon sa hinanali nilang kamatayon.

Nakuha diha sa crime scene ang tulo ka mga basiyo sa bala sa .9mm nga gituohang gikan sa armas sa mga kriminal.

Ang magtiayon gikatahong nanag-iya og siyam ka mga pasaheroang multicab nga nagbiyahian sa siyudad sa Sugbu ug nanag-iya sa lapad nga luna nga gitukoran sa ilang balay.

Nagtuo karon ang mga imbestigador nga posibleng tulis ang motibo sa pagpatay sa duha. (BANAT NEWS)