Gitadtad ug giputlag ulo

CEBU, Philippines - Naputol ang ulo ug gitadtad ang lawas sa usa ka lalaki human kini giunay og tadtad sa iyang paryente niadtong Sabado sa gabii diha sa Purok Kan- agahan sa sitio Tagaytay, barangay San Tabla sa lungsod sa Liloan.

Ang biktima nailhan nga si Bobet “Botoy” Canatan, 40, molupyo sa maong lugar samtang ang suspetsado nailhan nga Francisco Tumayao Tundag, 49, giingong paryente ra sa biktima.

Sa imbestigasyon sa kapolisan, nasayran nga ang biktima uban sa usa ka Metchie Salungdaguit sakay sa usa ka motorsiklo ug nagsunod ang ilang kaubang si Armando Sungcal nga sakay usab og laing motorsiklo.

Matud pa nakurat nalang sila pag-abot sa maong dapit dihang mibutho sa ilang agianan ang suspek nga nagwara-wara og sundang hinungdan nga mikanaog ang tulo sa ilang motorsiklo ug nag-iyahay sa pagpanalagan.

Apan gikatahong gigukod sila sa suspek ug ang naabtan mao si Canatan sa sudlunong bahin sa maong lugar ug dihadiha gitigbas makadaghang higayon. Ug dihang nahagba na kini gipunggotan og ulo sa suspek ang biktima. Sumala pa nga gibitbit sa suspek ang ulo ug gilabay pipila ka metros gikan sa lawas ni Canatan.

Matod pa ni PO3 Renato Pendo, sa Liloan Police nga human sa maong krimen misuway og sibat ang suspetsado apan ila ra usab kining nasikop.

Nakuha gikan sa suspek ang duha ka sundang, usa ka green polo shirt, ug maong shorts nga adunay lama nga dugo.

Butyag pa ni Pendo nga sa ilang nakuhang impormasyon, adunay sakit ang suspetsado nga nervous breakdown apan buot nilang masusi gyud sa mga psychologist si Tundag aron pagtino kung naa ba kini sa hustong pangisip. (/EIM) (BANAT NEWS)