Katapusang hearing sa kaso ni Ellah Joy gitakda

CEBU, Philippines - Gikatakda  karong umaabot nga Lunes, Nobiyembre 19 ning tuiga ang katapusang hearing sa mga saksi sa kamatayon ni Ellah Joy Pique kinsa gikidnap ug gipatay niadtong Pebrero sa miaging tuig.

Sa pakighinabi kagahapon sa pundok sa mga tigbalita kang Renante Pique, amahan ni Ellah Joy iyang gitug-an nga  si RTC-7 Branch 13 Judge Mendrado Paredes  miingon  nga naglisod ang  mga  abogado sa depensa tungod sa kadaghan sa mga saksi nga pabor kang Pique.

   Dugang pa niya nga mipadayag usab si Arnel Pura, sa  National Bureau of Investigation (NBI) Special Investigator nga nagpaabot gayud sila nga pugngan nga dili makapiyansa ang suspek  nga si Bella  Ruby Santos  sa kamatayon ni Ellah Joy  tungod kay  maglisod na unya sila sa pagpangita niini ilabi  na  kun  molayas  kini  ngadto  sa gawas.

Gipadayag ni Pique nga hangtod karon nasakitan pa gayud sila sa nahitabo sa  iyang  anak  nga si Ellah Joy apan igo na lamang sila sa paghandum niini tungod kay tua  naman  kini  sa lubnganan.

Apan  matud  pa  niya  nga usahay   adunay panahon nga mura  siya og abnormal tungod kay mukalit lamang siya og hilak ug human mokatawa na usab.

Gisaysay usab ni Pique nga uyon gayud siya sa balaod nga Death Penalty kung ugaling iimplementar kini pagbalik sa kagamhanan.

Gipanghinaot na lamang ni Pique nga unta dili gyud hatagan og higayon sa korte nga makapiyansa ang suspek ug nga giawhag niya ang mga ginikanan nga doblehon  ang pagbantay sa ilang mga anak aron dili na masubli pa ang sama sa nahitabo kang Ellah Joy tungod sa kadaghan na sa binuang karon.

Sa nasayran si Ellah Joy Pique nga nagpanuigon og 6 anyos gidagit  didto  sa gawas sa Jaclopan Elementary School sa lungsod sa Minglanilla niadtong Pebrero 8 sa miaging tuig ug kini napalgang patay   na didto sa tiilan sa pangpang sa lungsod sa Barili. (WC)(BANAT NEWS)