CCTODAI pabor nga tagalan ang mga PUJs

CEBU, Philippines - Pabor ang presidente sa usa ka pundok sa mga transport operator sa mga pasaheroan dinhi sa Sugbo nga tagalan og kinse ka tuig ang mga jeep pasaheroan sa Central Visayas nga maoy giplano sa Land Transportation Franchising and Regulatory Board-7.

Si Cebu Confederation of Transport Operators and Drivers Association Inc. (CCTODAI) president Ryan Benjamin Yu miingon nga mas nindot kun duna gyuy limitasyon ang katuigan nga padaganon ang usa ka jeep pasaheroan.

Matud pa ni Yu nga mas layo sa disgrasya kung ang mga pasaheroang  kagang-kagang dili na padaganon.

“ Mas maayo bitaw nga hatagan sad nato’g life ang sakyanan kay delikado sa pedestrian ug sa mga passengers as well,” matud pa ni Yu.

Apan daling mipasabot si Yu nga kun mao kini ang plano sa LTFRB kinahanglang ipaagi kini og ‘public consultation’ aron masayran usab sa katawhan ang maong lakang.

Kahinumduman nga ang LTFRB dili pa lang dugay mipahibalong karong bulan sa Enero sugdan na ang pag-phase out sa mga jeep pasaheroan didto sa Metro Manila nga lapas na og kinse ka tuig nga nagdagan.

Kini gihimo aron malayo sa peligro ang sumasakay ingon man ang mismong drayber. Nasuta nga bugtong mga bus, taxi ug V-hires lang maoy adunay tagal nga tag 13 ka tuig, ini og kaabot sa maong gidugayon dili na sila hatagan pa og prangkisa.

Sa pagkakaron daghan pa gihapong mga jeepneys sa Cebu ang susama sa usa ka higanteng taya nga gibutangan og makina ug ligid nga padayong namasahero ug nagbuga og itom nga aso nga makadaot sa kalikopan. (EIM) (BANAT NEWS)