Bala miungot sa bagtak sa polis

CEBU, Philippines - Usa ka pulis ang naangol human aksidente niyang napusilan iyang kaugalingon samtang nagtangtang  sa iyang armas diha sa iyang panimalay sa Barangay Pulambato, siyudad sa Bogo Huwebes sa gabii.

Ang biktima nailhan nga si Police Officer 1 Rino Inso, 30, kasamtangang nadestino sa San Remegio Police Station sa lalawigan sa Sugbo.

Sa pakighinabi kang PO3 Ryan Alarde sa Bogo Police Station kini mibutyag nga si Inso nag-unload sa iyang kalibre .45 Norinco nga pistol aron unta mopahuway apan aksidente kining mibuto.

Si Inso naigo sa walang bagtak ug miungot ang bala sa sulod. Swerte na lang nga walay ubang tawo pang naigo sa pagkahitabo.

Daling gitabang ang maong pulis ug gidala sa Bogo District Hospital ug gibalhin ra usab sa usa ka-hospital dinhi sa dakbayan sa Sugbo tungod kay kinahanglang lugiton pa ang bala nga miungot.

Matud pang Alarde padayon ang ilang imbestigasyon para masuta kung nakainom ba si Inso adtong tungora apan ang mga kaila ni Inso mibutyag nga dili moinom og bino ang maong polis.

“But ato gihapong i-investigate. Basin nagkumpiyansa siya or nakalimot sa basic rules,” matud pang Alarde.

Nagkanayon si Alarde nga usa sa mga basic rules sa pagdala sa armas mao ang pagbutang pirme sa hunahuna nga loaded ang armas, ayaw ibutang ang tudlo sa trigger ug tangtangon ang magazine aron makasiguro. (EIM)(BANAT NEWS)