Suspensyon ni Recamara gipadaplin

CEBU, Philippines - Wala una ipatuman ang suspension order batok sa hepe sa kapulisan sa Talisay City Police Office nga si Supt. Eddie Recamara subay sa kamandoan sa director sa kapulisan sa Police Regional Office (PRO)-7 nga si Chief Supt. Marcelo Garbo nunot sa nagsingabot nga  National Thanksgiving Mass alang kang San Pedro Calungsod karong Nobiyembre 30.

Si Garbo nga maoy mipirma sa suspension order ni Recamara midesisyon nga ini og kahuman na lang unya sa maong relihiyosong kalihokan ang 15 ka-adlaw nga suspensyon ni Recamara.

“Wala pang effectivity because of the thanksgiving mass kasi kasali siya sa security preparation,”  matud ni Garbo.

Ang pagsuspenso ni Recamara dili tungod kay pakyas siya sa pagdakop kang Joavan Fernandez kinsa gipasanginlang namusil sa usa ka gasoline station niadtong Domingo kundili tungod sa administrative nga kaso nga iyang giatubang.

Ang kaso gipasaka kini ni Danao City prosecutor Jose Dionisio Kyamko sa miaging tuig dihang si Recamara nadestino pa isip hepe sa Danao City Police Station una pa siya nahimong hepe sa Talisay City Police Station.

Si Kyamko giingong mipasangil ni Recamara sa pag-usab sa mga nakuhang ebidensiya batok sa usa ka drug pusher. Siya gipasakaan og serious irregularity and conduct unbecoming of an officer. Si Recamara mibalibad sa pagtubag sa maong            isyu.

Si Sr. Supt. Patrocinio Comendador, director sa Cebu Provincial Police Office, nagkanayon nga maayo og performance si Recamara isip hepe sa TCPS. Ang maong estasyon nahatagan og award isip best police station sa tibuok rehiyon tungod sa ubos nga kriminalidad niini. (BANAT NEWS)