2,500 ka sundalo motabang sa pagbantay sa Thanksgiving Mass

CEBU, Philippines - Mopakatap og 2,500 ka mga sakop ang Central Command aron motabang sa umaabot nga National Thanksgiving Mass pahinungod kang San Pedro Calungsod karong Nobiyembre 30 nga himuon sa South Road Properties.

Gibana-bana nga moabot sa 1,000 ka miyembro sa Philippine Army, Philippine Navy, ug Philippine Air Force ang motabang sa Philippine National Police sa pagpahigayon og crowd control.

Laing 1,500 nga miyembro sa Reserve Officer’s Training Corps apil usab nga ipakatap alang sa crowd control.

Matud ni Lt. Col. Christopher Tampus, tigpamaba sa CentCom, nga ang navy mao nay motabang sa Philippine Coast Guard sa seguridad sa ipahigayon nga fluvial procession ug ang uban anaa lang sa SRP.

Upat ka K9 dogs ug mga miyembro sa Explosive and Ordnance Disposal Detachment sa Central Command usab ang ibutang sa mga importanteng dapit sa maong kalihokan. Gipaabot nga moabot ang duha ka labing taas nga lider sa Pilipinas nga mao sila si Presidente Benigno “Ninoy” Aquino III ug Vice President Jejomar Binay.

“We will be involved in  securing both politicians,” matud ni Tampus. (BANAT NEWS)