Wanted sa Leyte nasikop
CEBU, Philippines - Ang wala pagsuot og helmet mao ray hinungdan sa pagkasikop dinhi sa siyudad sa Sugbo sa usa ka gipasanginlang big time “drug pusher” nga dugay na diay pinangita sa balaod didto sa Leyte.
Ang nadakpan sa mga sakop sa Punta Prinsesa Police Station sa Cebu City Police Office giilang si Loreto Bayno, 36, nagpuyo sa Sta. Teresita Village sa barangay Tisa sa siyudad sa Sugbo. Si Bayno gidakop sa grupo ni Insp. Pedy Noval ug SPO4 Rogelio Cañete uban sa mga sakop atol sa ilang pagpahigayon og checkpoint diha sa dalan Katipunan sa barangay Tisa ning dakbayan.
Matud pa nga Huwebes sa gabii dihang ilang nasigpatan si Bayno nga nagmotor apan nabantayan nila kining kalit nga mibalik sa agi hinungdan nga gisitar sa security detail sa checkpoint dili layo sa gihimutangan sa checkpoint.
Matud pa ni PO3 Reglyn Pepito sa Punta Prinsesa Police Station nga usa sa mga midakop kang Bayno nga nahinabi sa Banat News nabantayan nila kining mibalik sa agi ug dihang ilang gisitar duna kini gilabay nga usa ka gamay nga butang.
Dihang ilang gisusi usa diay kini ka paketeng shabu apan mihimakak ang suspek nga sa iya kini gikan. Unang kalapasan nga nakita sa kapolisan mao ang wala pagsuot ni Bayno og helmet.
Nadugangan pa gyud ang kaso ni Bayno dihang nasuta nga wala kini dalang rehistro sa iyang motorsiklo ug wala usab siyay lisensya nga napakita.
Sa pagdala kang Bayno sa police station nahibaw-an gikan sa usa ka Chief Insp. Efren Agda, hepe sa Carigara Police Station sa Leyte nga si Bayno pinangita na sa balaod tungod sa kaso sa ilegal nga drugas.
Aduna diay kini warrant of arrest nga giisyu ni RTC Branch 36 Executive Judge Lauro Castillo Jr. didto sa Leyte ug walay piyansang gitugot alang sa iyang temporaryong kagawasan uban sa usa ka Marilyn Rance kinsa padayon pang gipangita sa kapolisan.
Ang kaso ni Bayno didto sa Leyte may kalambigitan gihapon sa ilegal nga drugas.
Dihang migawas ang dagway ni Bayno sa balita mitawag sa telepono ang usa ka ahente sa National Bureau of Investigation-7 nga si Atty. Bernard dela Cruz nga nagpahibalong si Bayno dugay na nilang gipangita. (BANAT NEWS)
- Latest
