Walo mipasaka og kaso vs Aman Futures Group Inc.

CEBU, Philippines - Gipasakaan na og kasong estafa sa National Bureau of Investigation (NBI) ang chairman, incorporators ug mga ahente sa Aman Futures Group Inc. kalabot sa giingong investment scam.

Si NBI-7 Regional Director Edward Villarta mibutyag sa mga sakop sa media nga sa napulo ka mga reklamanteng miduol kanila walo lang niini ang mipasaka og kaso tungod kay ang duha wala makakompleto sa mga dokumentong gikinahanglan.

Si Virgilio Mendez, ang deputy director of the Regional Operations Services sa NBI maoy mipasaka sa maong kaso didto sa DOJ.

Ang mga gikasohan mao sila si Aman Amalilio, nga maoy chairman; Fernando Luna, Lelian Lim-Gan, Eduard Lim, William Fuentes, Naezelle Rodriguez ug  Lurix Lopez, isip mga incorporators ug agents sa maong kompanya.

Matud pa niini nga niadtong Oktubre 15, 2012 nadawat nila ang direktiba nga atimanon ang mga biktima sa maong investment scam nga taga dinhi sa Sugbo.

Ang mga reklamante mao sila si Allan Dianalan, Norhabib Condin, Ann Monica Urbina, Faisal Salic, Ayubkhan Conding  ug Agakhan Dianalan of Capitol Site, Derrick Yap  ug Philip Yap. 

Ang mga reklamante   mi-invest sa Aman Futures Group Inc. og P106,909,399 milyones.

Ang mga reklamante nakapakita og mga dokumentong nabiktima sila sa maong scam sama sa resibo sa bangko ug mga resibong giisyu sa maong kompanya.

Gimando na  ni  DOJ Secretary Leila De Lima ang paggukod sa mga nalambigit sa maong kompanya tungod kay liboan na ka mga tawo ang nailad niini.

Sumala pa sa mga report giingong nakalarga na sa Malaysia si Amalilio. Si Amalilio mi-post sa You Tube og video nga nangayo og pasaylo sa mga investors. (BANAT NEWS)