CEBU, Philippines - Patay nang napalgan sa katunggan ang usa ka ginang nga nagpakamatay pinaagi sa paghikog tungod kay walay ikabayad sa iyang daghang utang sa bangko ug lending didto sa Sitio Lawis Taog, barangay Valladolid sa siyudad sa Carcar niadtong Martes sa alas 8:00 sa gabii.
Ang nagpakamatay mao si Cristina Alesna, 51, nagpuyo sa maong lugar ug way klarung trabaho.
Matud ni PO2 Abelardo Beton sa Carcar City Police dihang nahinabi sa Banat News subay sa nakuhang impormasyon sa kapolisan gikan ni Rico Racho, 42, naputos sa utang ang namatay.
Matud pa ang biktima gawas nga duna kini mga utang sa lending utangan pa gyud kini sa bangko ug kanunay maproblema sa ibayad kun moabot ang petsa sa ting singil niini.
Ang mga silingan maoy nakadiskobri sa patay’ng lawas niini nga nakit-ang nagbitay nga dunay higot nga pisi sa liog nga gibaat ang pikas tumoy sa sanga sa kahoy nga pagatpat taliwa sa katunggan.
Gisuwayan pa unta og tabang ang ginang ug gihatud sa Carcar City District Hospital apan gideklarar kini sa mga doktor nga dead on arrival. (BANAT NEWS)