Gwen moimbistigar sa mga opisyal sa KEPCO-SPC

CEBU, Philippines - Gitakdang ipatawag ni Governor Gwendolyn Garcia ang mga kadagkuan sa Korean Electric Power Corporation Salcon Power Corp. (KEPCO- SPC) sa iyang buhatan sa Kapitolyo  aron  imbistigaron.

Kini aron masusi sa gobernador ug  ikapasabot sa  mga  opisyal  sa maong planta ang bahin  sa reklamo sa molupyo sa  barangay Colon , siyudad sa Naga bahin  sa  pagkatap sa  abog  nga itom sa  palibot  sa  planta ug mahanggap  sa katawhan sa kadalanan  ug  sa sulod  sa ilang  panimalay  

Imbistigaron sa gobernador ang  mga  opisyal sa Kepco-Salcon Power Corp (KSPC)  aron sayron  kun unsay  ilang  himoon aron masulbad  ang  maong problema.

Ang  mga  katawhan  sa dapit  nga  nahimutangan  sa planta  mireklamo  na  sa  mga  sakit-sakit  sa lawas  nga  ilang  nasugamakan sama  sa ubo-ubo,  hilanat, katol-katol  sa lawas  ug  uban.

Wala hinuon itug-an sa gobernador kun kanus-a niya ipatawag ang mga opisyal sa KEPCO-SPC apan iyang gitataw  nga nagpakabana  siya pag-ayo  sa panglawas  sa katawhan  sa Naga.

Matud  pa  sa gobernador  nga  pulos  mahinungdanon  ang  maong planta  ug  ang  panglawas  sa katawhan  busa  kinahanglang  atimanon  sa tagdumala  ang  maong  planta aron  dili  mohatag  og  hulga  sa kinabuhi  sa mga  molupyo  sa  palibot  niini.

Midugang  ang  gobernador  nga  dili  siya  gusto  nga  mosangpot  sa kadako  ang  maong problema busa gusto  niya  nga kahatagan  dayon kini  og  dinaliang  pagtagad  sa hingtungdan  nga  kompaniya.

Matud pa sa  gobernador nga ang iyang buhatan padayon nga nagmonitor sa mga kalihukan sa nahisgutang  coal-fired power plant sa siyudad sa Naga.

Hinuon iyang giklaro nga bisan pa man sa maong problema makapadayon gihapon sa pagpaandar ang maong planta kay mao man kini ang nag-supply  og  kuryente  sa lalawigan sa Sugbo.  (BANAT NEWS)