PhilHealth run gitakda sa Pebrero

CEBU, Philippines - Gitinguha sa kagamhanan nga madugangan  ang  kaalam sa publiko kalabot sa universal health alang sa pagpausbaw sa maayong panglawas sa katawhan, ug  pinaagi  sa pagpanguna  sa  PhilHealth ipahigayon niini ang usa ka PhilHealth Run for a Cause sa tibook nasud karong  umaabot Pebrero 17, 2013. Kining maong kalihokan maoy pagtamud usab  sa ika-18 nga anibersaryo sa buhatan sa PhilHealth diin adunay 18 ka dapit nga pahigayonan niining  maong programa sa dagan.

Sumala pa ni Dina Cinchez, Public Information Officer sa PhilHealth 7 atol sa bag-ohay pa lang gipahigayon nga Association of Government Information Officers (AGIO-7) nga kining maong gipasiugdahan  nila  nga  panagan bukas  sa tanang Filipino o kaha  langyaw nga gustong mosalmot tungod kay ang mahipos  nga pundo nga magagikan sa registration fee sa mga mangapil niini, itabang sa  paggasto sa mga inahan  ug anak  nga  masakiton og kanser.

Gibutyag  ni  Cinchez nga ang ilang Central/ Main office adunay benepisyaryo nga gahinan na daan sa makuhang pundo sama  niadtong  anaa sa National Childrens Medical Center didto sa National Capital Region(NCR). Apan  dinhi  sa Sugbo  ang  gahinan  sa  pundo  nga mahipos  gikan  sa maong fun run ihinabang  usab sa  mga  pasyente  nga  inahan  ug  anak  nga masakiton og kanser  nga  gisagop  sa  Gift of Life nga proyekto sa Rotary Club of Cebu District.

Kining maong organisasyon mihinabang sa mga bata nga adunay sakit nga nagkinahanglan og surgical operations. Giklaro ni Cinchez nga sa  mga  inahan  ug anak  nga mosalmot  sa dagan, kinahanglan  nga matag  usa  kanila mobayad  sa gitakdang  bayranan  sa rehistrasyon.

Hinuon  midugang si Cinchez nga adunay  discount alang sa sayo nga magparehistro busa ilang  giawhag  ang  tanan  nga  mosayo  aron makapahimus  sa diskuwento  nga  ilang  ihatag.

Samtang si Vanessa Lastimoso, Social Insurance Officer sa PhilHealth 7 miingon  nga ang rehistrasyon pagasugdan na karong  Nobiyembre 17 hangtod 18 ning tuiga didto sa Active Zone sa Ayala Center Cebu.

Dugang pa niya nga adunay upat ka kategoriya ang  maong  dagan nga maglangkob sa 3K, 5K,10K, ug usab 18K run.

Ang registration fee  sa  3K, P250,  P300 sa 5K, P350 sa 10K samtang P450 alang sa 18k.

Alang niadtong gustong magparehistro sa ilang online website mahimo  silang bisitahan   sa https;// run2013.philhealth.gov.ph diin tua  usab  didto ang registration form.

Ang  registration form  nga  ilang ma-fill-apan ila  nga  ipa-print  ug  dad-on  ngadto  sa  mga sentro  nga modawat  sa ilang bayad sama  sa SM Mall, PhilHealth Centers, Robinsons bank, ug CIS Bayad Centers.

Ang mga mananaog  sa 3k makadawat og  ganti  nga P3,000 sa first prize,P2,000 sa second prize, P1,000 sa 3rd prize samtang sa 5K makadawat og P5,000 sa 1st prize, P3,000 sa 2nd prize ug P2,000 sa 3rd prize, sa 10k nga kategorya makadawat og P8,000 ang 1st prize, P4,000 ang 2nd prize ug P3,000 sa 3rd prize ug alang sa 18k ang mananaog sa 1st prize makadawat og P10,000, P6,000 sa 2nd prize samtang P4,000 usab sa 3rd prize. Apan  ang dili makadaog makadawat og  finisher’s certificate ug finisher’s medal.

Matud  ni  Cinchez  nga gitarget nila nga managan  matag rehiyon mao  ang 6,000, apan  dinhi  sa rehiyon  7, ang tanang  mosalmot  sa  maong kalihokan  nga taga Siquijor, Negros Oriental ug  Bohol  kinahanglang  motipon  sa taga Cebu  ug anhi  managan  ang  tanan  sa dakbayan  sa Sugbo.

Ang tema sa maong PhilHealth Run for a Cause mao ang "Nationwide Run For Mother and Child Protection. (BANAT NEWS)