3 mipusil angol sa kontra sikop

CEBU, Philippines - Nadakpan sa kapolisan ang tulo ka lalaki nga miluthang angol sa usa ka gituohang kontra nila didto sa sitio Ylaya ,sa barangay Ibabao, lungsod sa Cordova sa miaging  gabii.

Ang nadakpan mao sila si Bryan Betolinamita, 20 ug duha ka kaubang bayong-bayong nga nagpanuigon og 17 ug 15 anyos ang usa ug usa nga pulos nagpuyo sa maong dapit.  Ang tulo maoy gitumbok sa kapolisan  nga mipusil  kang Raymond Ngujo, 19 , nga taga barangay Basak sa dakbayan sa Lapulapu kinsa naigo  sa paa.

Si PO1 Bryan Casiban sa kapolisan sa maong lungsod nga nahinabi sa Banat News miingon nga naglakaw sa karsada  sa  maong lugar ang biktima  dihang  may  motorsiklo nga  mihunong  sa iyang  palibot.

Usa  sa tulo  ka nagsakay  niini maoy  mipusil  sa  biktima  ug  mipabulhot dayon  sa pagpadagan  sa ilang sakyanan  human  masabak sa tuo  nga  paa  ang  biktima  ug misakuong  sa karsada.

Ang biktima dali nga nakapangayo og panabang sa iyang mga paryente sa maong dapit   kinsa maoy  mihatod  dayon  kaniya  ngadto   sa Lapulapu City Hospital apan  gibalhin  usab  dayon  ngadto sa Vicente Sotto Memorial Medical Center sa dakbayan sa Sugbo.

Dugang pa ni PO1 Casiban nga sa follow up nga  ilang  gipahigayon, ang tulo ka suspetsado ilang nadakpan ug positibo usab nga giila sa mga nakasaksi sa maong pagpamusil ug gitanggong na karon sa sulod sa detention cell. (BANAT NEWS)