Sa kasaysayan karon - Nobiyembre 14

Unang broadcast sa BBC

1922— Opisyal nga gibuksan ug misibya matag adlaw ang sikat nga British Broadcasting Corporation (BBC) nga may 6:00 PM news ni Arthur Burrows sa 2LO, Marconi House, London. Sunod adlaw naabot ang broadcast niini sa Manchester (2ZY) ug Birmingham stations (5IT). Ang unang trial broadcast sa station 2LO sa London gilabay sa 100W transmitter ibabaw sa usa ka building sa ika-11 sa bulan sa Mayo 1922. Human sa makuting negosasyon ug natukod ang British Broadcasting Company ug mibayad og Broadcasting License Fee  nga 10 shillings (18 pounds sa kwarta karon).

Maguikay flyover repair himuon sa Disyembre

Masinati unya ang paghuot sa dagan sa trapiko sa dalan M.C. Briones Avenue sa dakbayan sa Mandaue sa higayon nga magsugod na ang pag-ayo sa flyover sa eskina Maguikay sa bulan sa Disyembre sa Department of Public Works and Highways (DPWH) Region 7.

Si Engineer Roy dela Cruz nga  maoy project engineer sa DPWH 7 nga nahinabi sa Banat News niadtong miaging adlaw miingon nga mananghid pa sila nila ni Mayor Jonas Cortes sa dakbayan sa Mandaue ug Gobernador Gwendolyn Garcia kabahin sa proyekto.

Gipasabot ni Dela Cruz nga naglubyak-lubyak na sa nahisgotang flyover ug nagkinahanglan nang mabutangan og aspalto ug ipaayo ang 12 ka joints niini.

Hinuon iyang gipaniguro nga luwas pa gihapon ang maong flyover sa molabay sa mga sakyanan tungod kay wala man maapektohi ang kalig-on niini.

“The flyover itself is very stable because of its posts and structure,” mipasabot si Dela Cruz sa iyang pamahayag.

Dugang pa niya nga ang 256 metros nga Maguikay flyover repair project kabahin sa DPWH-7 rehabilitation of Cebu North Hagnaya Wharf Road project.(Romeo T.  Limpangog/EIM)