Thanksgiving mass

CEBU, Philippines - Traffic Plan sa SRP sa Nob.30 ipagawas sa CITOM

Nangandam na ang City Traffic Office Management sa ilang Traffic Plan alang sa umaabot nga National Thanksgiving Mass ni San Pedro Calungsod karong Nobiyembre 30.

Sa gipadalang pamahayag  ni Joy Tumulak sa Cebu City Traffic Operations Management (CITOM) nga karong Nobiyembre 29 sirad-an ang South Road Properties tungod sa himuong clearing operations ug ang pagpamutang og traffic signs gikan alas-10 sa gabii hangtud na sa alas-7 sa buntag sa Nobiyembre 30.

Dili na usab paagian ang pipila ka kadalanan sa syudad sa Sugbo nga palibot sa SRP ug ipatuman na usab ang traffic re-routing sa mga jeep de pasaheruan ilabi na niadtong moagi duol sa SRP.

Samtang dunay ipanghatag unya ang simbahan nga mga vehicle passes alang sa motambong nga 140 ka parokya sa Archdiocese of Cebu nga managlahi og mga kolor lakip na niadtong mga tawong dunay espesyal nga partisipasyon sa Thanksgiving Mass.

Samtang anha usab paagion ang tanang mga sakyanang may vehicle passes gikan sa amihanang bahin sa Sugbo ug dunay gitaganang mga parking spaces sa sulod mismo sa SRP.

Anha usab palutson sa Mambaling access road ang mga senior citizens, persons with disabilities (PWDs), VIPs ug mga sakyanan sa Emergency Medical Services ug mga gustong mosaksi.

Sa mga dili makabaton og vehicle passes dunay napulo ka mga Kaohsiung buses nga giandam ang siyudad sa matag distrito.

Anha sa dalan V. Sotto sa Cebu Technological University magpaabot ang bus sa mga taga north district ug sa dakong hawan atbang sa Talisay City Hall usab magpaabot ang bus sa mga taga amihanan. Ang mga dunay kakulian sa panglawas nga buot makatambong mahimong makasakay sa mga golf carts gikan sa mga nagkadaiyang golf clubs nga mopahulam niini.

Nunot sa gipaabot nga bagang duot sa tawo nianang adlawa ang kapolisan mipasalig og dugang mga polis nga magbantay. Si Cebu City Police Office director Sr. Supt. Melvin Ramon Buenafe miingon nga dunay paigong polis nga ipakatap sa maong adlaw.

Gipahimangnoan ni Tumulak ang mga motorista nga sundon ang mga ipamutang nilang traffic signs sa kadalanan aron dili makamugna og dugang problema sa dagan sa trapiko.

Ang Banat Manobela mopagawas unya karong Domingo sa re-routing plan sa CITOM alang sa mga pasaheroan ug ubang mga motoristang moagi duol sa SRP.

Traffic Education(Compulsory Signs)

Restriction Ends Signs

Ang Restriction Ends Sign nagpasabot nga ang tanang gidili sa pagsubay sa mga sakyanan niining dalana dili na mo-apply, kini sama sa speed limit, no-overtaking ug uban pa. TIPS: Kinahanglang alisto ang mata basin malipat ka ug madumbolan ka sa nagsunod, apan kinahanglang di mokumpiyansa. (BANAT NEWS)