Maayong pagpanaw marlon

CEBU, Philippines - Mipanaw na kagahapon ang beteranong magsisibya sa dyAB Radyo ug kolumnista sa Banat News nga Rated R nga si Marlon Bellita sulod sa Intensive Care Unit (ICU) sa Chong Hua Hospital sa alas-6 sa gabii.

Kahinumduman nga nalandig si Bellita sa tambalanan ug na-coma sulod na sa pipila ka semana human siya nalipong sa pag-abot niya sa iyang panimalay diha sa San Isidro, Talisay gikan siya ni-duty.

Sa pasiunang eksplinasyon sa mga doktor nagkanayon nga nibuto ang ugat sa utok ni Bellita tungod sa taas nga presyon sa dugo ug nakaapekto sa respiratory system niini.

Ang haya ni Marlon gipahimutang sa ilang panimalay sa Talisay ug gipaabot nga modagsang ang mga kaubanan niini sa media.

Nisikat pag-ayo si Marlon gumikan sa programa niya nga Rated R sa dyAB nga iya usab gisuwat dinhi sa Banat News nga makalingaw sa naminaw ug bumabasa.

Ang konseho sa dakbayan sa Talisay gikatakda nga moumol og resolusyon tungod sa maayong nabuhat ni Marlon sa siyudad.  

Sumala pa sa nagbangutang asawa ni Marlon nga si Hazel nga “natural death” ang kamatayon sa iyang bana kansang pagpitik sa kasingkasing miubos hangtud sa “zero.” Si Marlon ug Hazel adunay tulo ka mga anak nga nagpangidaron og 15, 10 ug 6-anyos.

Ang mga sakop sa Cebu Federation of Beat Journalists mopahigayon gihapon sa benefit concert karong Biyernes ug mogahin og oras alang sa paghatag og tribute kang Marlon.

Nagbaha usab ang mga mensahe sa official account sa CFBJ nga mipaabot sa kasubo sa pagpanaw sa kauban sa industriya.

Ang pangulo sa CFBJ nga si Elias Baquero mihulagway kang Marlon nga “Marc Logan of Cebu” gumikan sa mga makalingaw niining kinaiya.

Si Bellita ang president emeritus sa Media in Cebu South (MICS) nga nag-cover sa mga kasikas sa unang distrito sa probinsiya sa Sugbo. Siya nagdugay sa sibyaanang dyAB sa ABS-CBN Cebu kansang mga komedya matan-aw sa YouTube.

Usa sa mga mi-post kang Marlon sa YouTube mao si Jason. Si Marlon mikanta dinhi og “I’m Yours” (Bisaya version) nga duna nay 126,000 post kagahapon. 

Katapusang gilingaw ni Marlon ang iyang mga readers sa Rated R dinhi sa Banat News giulohan niya kini og “Bukog” nga daw duna nay sagol nga kahulogan gawas pa sa komedya.

Ang “Bukog” napatik dinhi sa Banat News niadtong Oktubre 31, bisperas sa Adlaw sa mga Santos ug duha ka adlaw sa dili pa ang Adlaw sa mga Minatay. Human niadto nalandig na sa tambalanan si Marlon.

Karong adlawa unta adlaw’ng Miyerkules duna siya’y lindog nga mogawas dinhi sa Banat News. Ang Banat News miduyog sa pagbangutan sa pamilya ni Marlon ug sa mga kaubanan sa industriya sa iyang pagpanaw. (BANAT NEWS)