Way test flight

CEBU, Philippines - Gawas sa pilot error ug depektosong abyon dunay laing gitumbok nga hinungdan sa pagkahagsa sa Piper Seneca plane nga mikalas kang anhing interior secretary Jesse Robredo ug duha ka pilotong sila si Capt. Jessup Bahinting ug Nepalese student pilot nga si Kshitiz Chand niadtong Agosto 18 sa kadagatan sa Masbate.

Sa gipagawas nga opisyal nga resulta sa imbestigasyon nga gihimo sa Aircraft Accident Inquiry and Investigation Board (AAIIB) sa Civil Aviations Authority of the Philippines nga duna sila’y nakit-ang daw panagkunsabo tali sa lokal nga opisyales sa CAAP ug sa Aviatours.

Si Presidente Benigno Aquino III nga maoy mibasa sa report nga gisibya sa national television stations, miingon nga nahatagan og clearance ang maong abyon bisan walay test flight nga nahitabo gikan nailisan og propeller ang tuong makina niini.

“Nobyembre 2011 nang pinalitan ang right-hand engine propeller ng bumagsak na Piper Seneca di umano.

Upang matiyak na ligtas sa paglipad ang eroplano, nag-file ng propeller overhaul report si Ginoong Nelson Napata, ang Director for Maintenance ng Aviatours noong Enero, Na agad namang inaprubahan ng CAAP Airworthiness Inspector na si Ginoong Fernando Abalos,” matud pang Aquino.

Giingong dunay nahitabong test flight niadtong Enero 7 sa maong tuig ug kini nakapasar apan wala kini diha sa talaan sa flight records sa maong abyon. Usa ka piloto sa Aviatours ang matud pa sa CAAP nga miangkong gipapirmahan kaniya ang Flight Test Report bisan walay nahitabong test flight.

“Walang record sa aircraft logbook ang nasabing test flight. Wala ring nakatalang flight plan dito, ayon sa Mactan International airport. Malinaw po ang ginawa nilang panlilinlang at pandaraya. Ang naging kabayaran: buhay ng tatlong tao,” padayag pa ni Aquino kinsa miingon nga wala untay trahedyang mahitabo kung misunod lang sa proseso ang mga hingtungdan.

Apan sa gipagawas nga pamahayag sa Human Resource Manager sa Aviatours kagahapon nga si Michelle Ferol, sila mismo nakurat sa nakita sa CAAP nga dunay pagmaniobra sa clearance sa abyon.

“As to the issue of the fraudulent collusion between Aviatours and CAAP official during the airworthiness release of the aircraft, we just have to admit that we are totally shock and hurt for we are in any manner or form not knowledgeable to this kind of devious deal. Such things could have been prevented if everyone is just honest and dedicated to their respective honorable duties and responsibilities,” matud pa sa pamahayag.

Matud pa sa pamahayag sa Aviatours magsilbi unta kining leksyon sa mga flight operators ug bisan na sa mga naa sa ahensya sa gobiyerno nga magtinarong sa ilang mga responsibilidad.

Gihulagway usab ni Aquino si Bahinting nga kuwang sa eksperiyensya pagpalupad og abyon ug luwas nga makatugpa bisan usa na lay makinang nagdagan niini.

Matud pa nga duna pa untay taas nga oras si Bahinting aron mobalik sa Mactan 23-minutos human niya mamatikding may problema ang abyon sa tuong makina.

Apan mipadayon kini sa paglupad nga miabot pa og usa ka oras una pa napawong ang tuong makina ug dugang 17-minutos pa kining naglupad nga usa na lay makina una pa nahagsa.  Ang Aviatours sa ilang pamahayag nagkanayon nga tawo lang si Bahinting ug duna gyuy posibilidad nga kini masipyat.  Samtang sukwahi sa nahaunang migawas nga leak report sa imbestigasyon, giingong si Bahinting ug dili si Chand maoy naglingkod sa pilot seat.

Samtang giisip ni interior secretary Mar Roxas sa interbyu sa TV Patrol Central Visayas nga sarado na ang imbestigasyon sa maong aksidente apan magpadayon ang imbestigasyon sa CAAP pagsubay niadtong mga abyon gikan sa uban pang charter flight operators nga nainspeksyon ni Fernando Abalos.(Edwin Ian Melecio, Pepe Sollano, Ria Mae Booc ug reports gikan sa GMA News Online)(BANAT NEWS)