Van nalimbuwad 1 patay 6 angol

MANILA, Philippines - Usa ang patay ug unom ang naangol  lakip na ang drayber human modasmag sa railing ang sakyanan nga ilang gisakyan ug nalimbuwad didto sa highway sa Sityo Kaawa barangay ,Perelos siyudad sa Carcar niadtong Domingo sa alas 10:30 sa gabii.

Ang namatay mao ang pasahero nga si Gomersendo Laluna, 40 , ulitawo, nga taga  barangay Papan, lungsod sa Sibonga. Samtang ang   mga  angol mao sila si Balbin Blanco, 19 , ulitawo, taga Magcagong , Sibonga, Jeren Estomago,20, ulitawo taga Bahay , Sibonga, Johnrel Blanco,   22, ulitawo, taga Papan Sibonga, Ivan Gorgonia,19 , nga taga Managasi , lungsod sa Tabogon, Artemio Laluna,35 , ulitawo ug taga Bahay,  ug ang drayber sa Toyota L-300 Van kolor puti nga adunay plaka nga GKS-993 nga si Pedro Carcallas ir., 39 , ulitawo , ug taga Poblacion ,Sibonga.

Si SPO1 Eduardo Bagol, traffic investigator sa Carcar City Police  Station mibutyag  sa Banat News  nga ang mga biktima gikan sa lungsod sa Sibonga ug  mibiyahe  paingon sa siyudad sa Sugbo nga direksiyon.

Apan pag-abot sa maong lugar  miingon  ang drayber  nga adunay usa ka awto nga wala makuha ang   brand  niini ug plate number  mikalit og  labang  gikan sa intersection, busa  wala  siya makabantay    apan  milihay  siya  aron dili magkabangga apan didto  na hinuon  siya modasmag  sa railing  nga  puthaw  daplin  sa karsada.

Tungod  sa  kakusog sa iyang dagan, wala  makapugong  ang maong  railing,  busa milahos  ang  sakyanan  ug nalimbuwad sa walang bahin sa karsada.

Ang mga sakay   niini pulos nakaangkon og mga pangos ug bun-og hinungdan nga gidali og dala sa Carcar City District Hospital apan si  Laluna gideklarar nga dead on arrival (DOA) gumikan  sa grabeng kadaut sa iyang ulo.

Ang ubang mga biktima luwas na sa piligro apan nagpaalim pa sa ilang pangos ug bun-og sa tambalanan.( /WC) (BANAT NEWS)