Merkado sa Mandaue taoran og CCTV camera

CEBU, Philippines - Ang pagbutang og mga CCTV camera alang sa kasiguroan sa mga customer  sa merkado publiko  sa dakbayan  sa Mandaue gikalipay  sa mga vendor.

Si Fe Arisgado nga maoy chairman sa Mandaue City Vendor’s Multi-Purpose Cooperative (MAVENCO) mibutyag  nga dako og bintaha ang ilang gibaligya nga mga isda ug karne sa sulod sa nahisgotang merkado kun  itandi sa Pasil, dakbayan sa Sugbo.

Si Musoline Suliva nga maoy market administrator sa merkado publiko sa maong dakbayan   nagkanayon  nga 36 ka mga CCTV camera  ang  itaud  sa kagamhanan  sa maong merkado sa siyudad.

Matud pa niya nga kun  mamontar  na  ang CCTV  camera, siguradong  masakpan  na  ang mga  mangunguot, kawatan ug  tulisan sa maong lugar.

Di  usab  sila makaikyas  tungod  kay  mga  security guard  nga  magbantay  sa merkado sulod sa 24 oras.

Gawas niini  may  mga dugang  assistance desk   usab  nga  madangpan sa mga kustomer  kun may reklamo sila  bahin sa mahal nga presyo o kulang ba kaha  sa timbang  ang  ilang  pinalit  nga  bugas o isda. Giangkon niya nga  sa bag-o pa nga gibuksan ang maong merkado publiko sa dakbayan  daghan   ang  naglisud   sa kasakyan alang sa mga pumapalit gikan sa kabarangayan.

Hinuon gitataw ni Musoline   nasulbad  ang  maong suliran  pinaagi sa paghatag  og  rota sa mga sakyanan nga pasaheroan ngadto  sa maong merkado sa dakbayan. (Romeo T.  Limpangog/WC) (BANAT NEWS)