Tanang brgy makadawat og hinabang salapi

CEBU, Philippines - Gipasabot ni Philip Zafra, chief of staff ni Mayor Michael Rama nga makadawat ang tanang barangay  sa siyudad sa Sugbo og financial assistance alang sa ilang mga proyekto apan gikinahanglan nga makompleto ang ilang mga dokumento.

Mao kini ang tubag ni Zafra sa  mga  pakisayud bahin  sa ubang  mga  barangay nga hangtud karon wala pa  makadawat  sa giandam nga  financial assistance alang sa ilang mga proyekto  sa barangay.

Matud pa niya nga ang Project Implementation and Monitoring Office (PRIMO) sa buhatan ni Rama motabang  sa mga barangay nga wala pa’y igong kaalam sa paghikay sa mga dokumento sama sa liquidation sa salapi  nga  ilang nadawat  sa nangagi ug  unsay  ilang  gigastohan sa  maong  hinabang

Kahinumdoman nga pipila  sa mga barangay ang nakadawat  sa ilang mga financial assistance nga kapin  sa P100 milyones sa miaging adlaw  gikan sa kagamhanan sa siyudad sa Sugbo.

Ang nahisgutan nga pundo   gikuha  gikan sa special development fund sa siyudad karong tuiga.

Pipila sa mga opisyales sa barangay ang mipadayag nga dako kaayo og ikatabang ang maong hinabang  salapi  sanglit ila kining  ikadugang sa gastuonon  sa nagkadaiya nga proyekto sa ilang dapit sama sa pagpaayo sa mga kadalanan ug  uban pa.

Samtang una nga gipadayag sa mayor nga kasagaran sa gisugyot  niya nga budget alang sa 2013 iyang   gitagana sa mga proyekto sa barangay.

Giingong   80%  na sa mga  barangay ning  dakbayan  ang  nakadawat  sa  maong  mga hinabang ug  karong  sunod semana may  dugang  pang   mga barangay  ang makadawat  niini.

Nagkanayon si Rama nga dili kini pamolitika gumikan  kay obligasyon niya nga mutabang  sa iyang konstituwente isip amahan sa dakbayan.

Gani nakadawat usab sa  maong  hinabang  ang  mga barangay kansang mga opisyales dili niya kaalyado. (/WC) (BANAT NEWS)