Upat sa unom nga nag-pot session sikop

CEBU, Philippines - Upat sa unom ka mga lalaki nga nag- pot session  nadakpan  sa kapolisan  dihang  gironda niini ang  usa ka payag didto sa Sitio Patag, barangay Buagsong lungsod sa Cordova, niadtong Sabado sa alas 10:00 sa gabii.

Ang mga nadakpan mao sila si Elmer Rosani, 33, minyo, Ryan Terol, 24, Bartolome Auxtero,18, ug Renante Rosani, 23, pulos  ulitawo, nga managsilingan sa   nahisgutang lugar. Apan ang laing duha nila ka  kauban kansang  mga  ngalan  wala  makuha  sa kapolisan   naka- eskapo sa maong pagpangronda.

Ang mga nasakmit  gikan  sa  mga  nadakpan mao  ang  upat ka pakite sa plastic nga dunay sud nga gituohang shabu, laing upat ka sachet nga basiyo na ug gituohang gisudlan og shabu ug  maoy  ilang gigamit  sa pot session, 6 ka tin foil ug 2 ka disposable lighter.

Gibalhug na karun sa karsel ang  upat ka dinakpan ug karong buntag gitakdang pasakaan   sila  og  kaso human  sa  pagpagawas sa resulta sa urine test  nila  ug  ang resulta  sa laboratory  test   sa  nasakmit  nga gituohang  shabu  gikan sa PNP crime laboratory. (Darrel A. Carumba/WC) (BANAT NEWS)