Nagselos nga waiter mikulata sa dancer tiklo

CEBU, Philippines - Nasikop  ang usa ka waiter nga nangulata og sexy dancer sa balay kalingawan sa dalan A.C. Cortes sa barangay Guizo, dakbayan sa Mandaue  sa miaging kaadlawon

Ang  nagkagulkol karon  sa prisohan mao si Raul Noval,  52, minyo, nga nagpuyo sa barangay  Alang-Alang sa maong dakbayan ug nagtrabaho isip waiter sa Golden Eye Bar nga naghimutang sa barangay Guizo sa maong dakbayan.

Si PO2 Narsis Baay sa kapolisan sa Presinto 1 sa Mandaue City Police Office (MCPO) nga nagbase sa barangay Centro nga nahinabi sa Banat News miingon nga ang biktima nga si Siovy, 26, kauban sa trabaho sa maong suspetsado.

Dugang pa niya nga maong sexy dancer sa matag human niini og sayaw adto gayud kini molingkod sa nagbinugtong nga lalaki sa daplin nga lamesa unya malipayon kaayo sila  nga magkukabildo.

Unya inigpakpak sa kamot  ni Siovy moduol  dayon  ang  mga waiter aron kuhaon  ang order  sa ka-table  niining  customer.

Si Noval nga maoy waiter sa maong  higayon mao usab ang magpunay  og hatod og ilimnon nga gi-order sa maong lalaki  hangtod nga nabati sa suspek  nga  mokuyog si Siovy sa maong lalaki sa pagpauli na niini.

Gumikan  sa tumang pangabubho, mihiwasa si Noval   sa kasuko  ug  diha-diha gikulata  niini si Siovy  nga maoy nakaingon sa pagkasamad sa agtang   sa maong  dancer.

Human sa maong pangulata  gihatud dayon  ang  biktima sa iyang mga kauban nga  sexy dancer ngadto sa Mandaue City Hospital ug  ang suspetsado  gidakop usab dayon sa mga polis ug gibalhog sa detention cell.

Ang kaso  nga  paglapas sa RA 9262 o balaod nga nagdili sa pagpanagmal  sa kababayen-an  maoy  ipasaka  batok kaniya. (Romeo T.  Limpangog/WC) (BANAT NEWS)