Lalaki gidul-itan og pusil sa ulo patay
CEBU, Philippines - Maayong pagkabuslot sa ulo sa lalaki human kini gipusil sa lalaking nagmotorsiklo pasado ala-una sa miaging hapon diha sa sitio Lawis-Iba barangay Candulawan syudad sa Carcar.
Ang biktima nailhan nga si Ronald Alpar, 26, molupyo sa maong lugar samtang ang mamumuno gihulagway nga nagsakay og itom nga motorsiklo ug nagsul-ob og camouflage.
Sa pasiunang imbestigasyon sa kapolisan nasayran nga ang biktima miadto sa panimalay sa iyang silingan nga si Marilou Cabaluna aron kuhaon ang baraha.
Apan sa dihang migawas na unta kini sa maong panimalay kalit lang nga mipatim-aw ang usa ka lalaki ug gidul-itan og pusil sa ulo ang biktima ug dihang natumba si Alpar yanong milakaw ang lalaki balik sa motorsiklo ug mibiya sa dapit.
Si SPO1 Edgar Causon, usa sa mga imbestigador sa kapolisan sa syudad sa Talisay mibutyag nga adunay nakasaksi sa maong panghitabo apan wala kini makaklaro sa hitsura sa mamumuno.
Wala pay klarong nakuhang motibo ang kapolisan sa maong krimen apan nakadawat sila og impormasyong giingong sigeng makakita og away sa ilang dapit ang biktima. (Lesley Caminade-Vestil/EIM) (BANAT NEWS)
- Latest
