'Drug pusher' gikaligo og bala

CEBU, Philippines - Usa ka gipasanginlang tigpayuhot og ilegal nga drugas ang talandugon ang kahimtang human kini gipaulanan og bala kagahapon sa kaadlawon diha sa iyang giestambayan sa barangay Inayawan sa dakbayan sa Sugbo.

Ang biktima nailhan nga si Clemente Ecot alyas Ernesto Ecot, 38, molupyo sa maong lugar samtang usa ka Amang Villareal ug usa ka wala mailhing tawo maoy gitumbok nga mipusil sa biktima.

Base sa pasiunang imbestigasyon sa kapolisan nasayran nga ang biktima nagkaon duol sa usa ka kan-anan dihang nangabot ang mga suspek ug walay igong hinungdan gipaulanan kini og bala.

Bisan paman og samaron nakadagan gihapon ang biktima samtang ang mga suspek daling mikaratel og dagan palayo.

Ang biktima daling gidala sa Visayas Community Hospital tungod sa naangkong samad pinusilan sa likod nga milapos sa iyang tiyan ug sa walang tiil. Si PO3 Leroy Baguio, sa Cebu City Police, Homicide Section, mibutyag dihang nahinabi sa Banat News nga aduna silay nakuhang mga drug paraphernalia sa payag sa biktima.

Dako ang pagtuo ni Baguio nga usa ka drug den ang gipuy-an sa biktima. “Suyopanan jud to didto kay naa man mi nakuhang mga drug paraphernalia,” pasabot pa ni Baguio.

Gibutyag usab ni Baguio nga base sa ilang pagpangutana mamaligyaay og ilegal nga drugas ang biktima ug kini mao ang ilang gidudahang posibleng motibo sa pagpusil kaniya.

Nakuha sa crime scene ang  siyam ka kabhang sa kalibre .45, upat ka deformed slug ug lima usab ka kabhang sa .357 nga bala. (Lesley Caminade-Vestil/EIM) (BANAT NEWS)