Lahug tarokan og Police Station

CEBU, Philippines - Naglaraw  si Mayor Michael Rama nga magpatukod og dugang  mga police station sa siyudad sa Sugbo para    sa  Barangay Lahug.

Suma pa sa mayor nga usa ka dakong barangay ang Lahug busa angayan lang nga butangan  kini og police station.

Matud  pa ni Rama  nga nagbaha usab ang mga patigayon sa maong barangay  ug gipanglantawan niya nga dako kaayo og matabang kung aduna kini kaugalingong police station.

Ang Lahug nahisakop sa area of responsibility sa police station 4 nga  nahimutang sa  Barangay Mabolo .

Nagkanayon ang mayor nga dako ra kaayo  ang sakop sa police station 4 busa kinahanglang  maiban-ibanan  kini  pinaagi  sa pagpatukod  og  laing police  station  nga  mahimong  mosawo  sa  ubang  mga  lugar  nga gisakop  sa maong  buhatan  sa kapolisan.

Mapasalamaton si Rama sa  kagamhanan sa probinsya sa Sugbo nga maoy mohatag unya sa luna nga tukoran sa police station diha sa barangay Lahug.

Gawas niini  naglaraw   usab siya nga ipa-renovate ang Mambaling Police Station.

Sama sa naandan,  moduol  na  usab siya og pribadong sektor  aron motabang sa maong proyekto.  (BANAT NEWS)