Suspek sa paglugos sa silingan tiklo

CEBU, Philippines - Nadakpan   sa kapolisan  ang   usa ka minero  nga suspetsado  sa pagpanglugos   og  usa   ka dalagita  nga iyang silingan didto sa bukirang bahin sa barangay Manlapay, lungsod sa Dalaguete niadtong Biyernes sa alas 3:15 sa hapon.

Ang nadakpan  mao si Reynaldo Pia Amandoron, 37,  minyo, nagpuyo sa Lower Manlapay ug nagtrabaho isip minero  sa maong  lugar.

Si SPO1 Veronico Centino,  desk officer sa Dalaguete Police   Station mibutyag  sa Banat News  nga ang kapolisan gipangulohan sa ilang  hepe nga si Insp. Dexter Basiergo  maoy  misilbi  sa  warrant of arrest  nga giluwatan ni Argao RTC branch Judge Maximo Perez sa kasong pagpanglugos  ug  Child Abuse base sa RA 6710 batok sa suspek.

May labot kini sa giingong  paglugos   niya  sa usa ka 16 anyos nga dalagita  nga anak  sa iyang  silingan kansang  ngalan  gipugngan.

Ang  giingong  pagpanglugos  ngadto  sa biktima  kansang ngalan  gipugngan sa Banat News  nahitabo niadto pang miaging tuig. Nasikop usab ang suspek    didto  sa iyang  gitrabahoan  human  niya dawata  nga malinawon  ang warrant  of arrest   sa kapolisan. Wala kini  mopakita  og  pagsukol sa mga  otoridad  ug  nagtingkagol na karon sa karsel sa kapolisan  sa maong  lungsod.  (BANAT NEWS)