6 ka karaang bomba nakawtan

CEBU, Philippines - Unom ka mga vintage bomb nga gituohang kabilin  pa sa ikaduhang gubat sa kalibotan  nakuykoyan sa usa ka mag-uuma  didto sa Sitio  Guiwanon, barangay Poblacion, lungsod sa Dalaguete kagahapon sa alas 7:30 sa buntag.

Si Felix Serenio, 70, minyo, mag-uuma nga nagpuyo sa maong lugar  mibutyag  sa kapolisan  nga samtang  nagguna  siya  sa iyang   kamaisan  nakurat  na lang  siya  dihang  nasindolan  sa iyang  guna  ang  puthaw  nga  gilubong  sa yuta  ug  sa dihang  iyang  gikawot  nasuta  niya  nga  mga karaan  diay  nga  bomba.

Si SPO1 Veronico Centino, desk officer sa Dalaguete Police  Station  mibutyag sa Banat  News nga  ang  maong  bomba  tag-ingon  ra  kadagko  sa 8 oz.  nga botelya  sa softdrink.

Daling gipahibawo niini ang iyang mga silingan ug didto ilang gihipos ang maong mga bomba ug ila  dayong  gireport   ngadto sa kapolisan sa lungsod.

Mainampingon  nilang  gihatod  ngadto  sa  buhatan  sa kapolisan  ang  maong  mga  bomba  sa kabalaka  nga  kini  mamuto.

Matud ni SPO1 Centino kasamtangang gipahiluna nila sa safety nga lugar sa  motorpool  sa lungsod ang maong mga bomba samtang gipaabot nga kuhaon kini sa mga sakop sa bomb disposal unit sa Cebu Police Provincial Office (CPPO).  (BANAT NEWS)