Fluvial Parade sa Birhen sa Regla plantsado na

CEBU, Philippines - Plantsado na ang tanan alang sa kapistahan sa Birhen sa Regla sa dakbayan sa Lapulapu diin usa ka "Fluvial Procession" maoy magsilbing timailhan sa unang adlaw sa nobenaryo sa maong patron karong umaabot Nov. 12, 2012.

Ang Fluvial Procession sugdan kini sa usa ka Santos nga Misa sa Marigondon Parish Church karong Nov. 12 sa alas 6:00 sa buntag ug sundan kini sa usa ka procession gikan sa simbahan ngadto na sa kadagatan sa Brgy. Subabasbas diin manukad ang fluvial procession. Ang mga barko ug motorbanca molibot sa Mactan Channel dala ang imahen sa Birhen sa Regla ug adto modunggo sa Muelle Osmeña Wharf sa Brgy. Poblacion ug dad-on kini ngadto sa Birhen sa Regla National Shrine ug kini sugaton nila ni Lapulapu City Mayor Paz Radaza ug banang si Kong. Arturo Radaza uban sa mga opisyales sa dakbayan sa Lapulapu.

Matud pa ni Lapulapu City Police Office Director Sr. Supt. Rey Lyndon Lawas andam na ang seguridad alang sa maong kalihokan.

Ang mga sakop sa Philippine Air Force, Philippine Navy ug uban pang special units sa kapolisan moabag usab sa pagbantay sa palibot atol sa maong kapistahan.

(BANAT NEWS)