Sugal nga suertres 5 sikop

CEBU, Philippines - Lima  ka tawo ang nasikop  human  sila  hisakpi  sa  akto  nga  namaligya  og numero   ug  sa samang  higayon namusta  usab  sa  suertres  nga masiao   atol  sa ronda  nga  gilusad  sa kapolisan sa  managlahing dapit  sa dakbayan sa Lapulapu   sa miaging  gabii.

Ang mga nadakpan mao sila si Victor Hilario Patalingjug, 57, Teresita Brigante, 53, nga taga barangay Pusok, Marvin Parba, 34,  Ericson Mardal, 28 ug usa ka 17 anyos nga lalaki nga maoy tigkolekta sa mga tally sheet gikan sa mga usher sa maong ilegal nga sugal.

Si Senior Inspector Rogelio Penida, hepe sa City Intelligence Bureau (CIB) sa Lapulapu City Police Office (LLCPO) maoy nangulo sa operasyon nga miresulta sa pagkasikop sa lima ka mga suspetsado.

Matud pa ni PO2 Erly Brady nga sakop sa CIB nga nahinabi sa Banat News nga una nilang nasigpatan sa barangay Pusok sa maong dakbayan si Brigante nga nag-isyu  og numero sa suertres ngadto kang Patalingjug.

Nasakmit  gikan  sa suspetsado   ang  mga tally sheet, ballpen, calculator nga naglakip sa kombinasyon nga triple -double nga numero nga nagpaila nga masiao suertres ang gipasiugdahan niini.

Si PO2 Brady miingon nga alas 9:00 ang takna sa gabii ilang nadawat ang tawag sa telepono gikan sa nagpakabana nga molupyo sa maong dapit kalabot sa nag-parking nga awto ug motorsiklo nga sakyanan  usab  sa menor de edad  nga  tigkolekta sa mga tally sheet sa barangay Basak sa matag gabii.

Dihang ilang gisusi ilang nasuta nga positibo   ang tanan base  sa mga ebidensiya nga ilang nasakmit nga naglakip sa 63 ka tally sheet ug P8,000 nga salapi nga gituohang halin   o  pusta usab niini.

Ang tulo nga sila si Parba ug Mardal  nga kauban sa 17 anyos nga lalaki  nga  kolektor  sa mga tally sheet  lakip usab sa ilang nasikop.

Ang mga dinakpan ilang gipasakaan og kaso   gumikan  sa paglapas  sa Republic Act  9287 kon ilegal numbers game nga maoy nakaingon karon sa ilang pagkabalhog sa sulod sa detention cell sa kapolisan sa maong  dakbayan. (BANAT NEWS)