Uniporme sa taga Sta. Fe di ipasul-ob

CEBU, Philippines - Gipaabot nga magkalidadis   ang isul-ob  nga uniporme sa mga players ug mga magtutudlo sa Sta. Fe National High School (SFNHS) sa lungsod sa Sta. Fe isla sa Bantayan atol sa parade ug opening sa Provincial Meet nga ipahigayon didto sa lungsod sa Asturias karong adlawa.

Kini human did-i  ang  mga  magtutudlo  sa maong  lungsod   pagsul-ob   sa  ilang mga bag-ong  gipatahi  nga uniporme nga hinatag  sa usa ka politiko.

Ang  maong  pagdili  gihimo  atol  sa miting  sa  mga magtutudlo  nga  gipatawag  ni  Mayor Jinnefer Ilustrisimo  ug  sa bana niini  nga si kanhi  mayor Roger Ilustrisimo  sa maong  lungsod.

Si Benjun Penalosa, magtutudlo  ug coach sa delegasyon sa SFNHS  mitataw nga gipatawag sila sa mayor ug bana niini human mahibaw-i nga si Jose “Titing” Esgana maoy migasto sa pagpatahi sa maong mga uniporme.

Si Talisay barangay Councilor Paulo Esgana mitug-an sab atol sa interview sa Bantay Radyo nga daghan sa ilang mga player ang nagproblema karon kay naglibog kun unsay sul-obon sa opening sa provincial meet kay dili man ipasul-ob ang ilang uniporme.

Gisuwayan  pagkontak ning tigbalita ang buhatan ni mayor Ilustrisimo   bahin  ning maong isyu sa telepono 438-9220 aron pagkuha sa iyang habig apan kanunay’ng bisi ang maong linya.

Samtang si Esgana sa iyang reaksyon pinaagi sa text message mikonpirmar nga miduol ug mihangyo  kaniya ang maong mga magtutudlo   ug nagpatabang alang sa ilang uniporme sa  maong provincial meet   kay apiki  kaayo  sila  sa kuwarta ,  kay  wala man  mogahin  ang lungsod  alang  sa  ilang uniporme.

Gitug-an ni Esgana nga migasto siya og kapin sa P30 mil   sa  pagpatahi sa maong mga uniporme sa basketball team, volleyball sa babaye ug lalaki ug mga uniporme sa mga faculty ug coaching staff.

Apan gipasabot ni Esgana nga walay kolor pamolitika ang iyang gihimo tungod kay igo lang siyang mitubag sa hangyo sa mga magtutudlo  ug  sa  mga players nga nanginahanglan niadtong tungora.

Si Esgana maoy kandidato pagka mayor ni Kongresista Benhur Salimbangon sa Sta. Fe atbang ni Mayor Ilustrisimo nga kaalyado ni kanhi kongresista Celestino Tining Martinez. (BANAT NEWS)