Traffic enforcer gipatay laing usa gitadtad og bala

CEBU, Philippines - Usa ka traffic enforcer ug police asset gipusil patay ug usa ka canvasser og mga bato ang gipusil patay sa managlahing insidente sa lalawigan sa Sugbu.

Ang traffic enforcer nga si Niel Sabayton, 36, paingon na unta pauli kauban ang asawa niini sa National Highway sa Barangay Luyang, Carmen mga alas 11:15p.m. sa gabii dihang kalit nga gipusil sa wala mailhing tawo. Si Sabayton nakaangkon og usa ka samad pinusilan sa buko-buko niini nga ang bala milapos sa dughan  ug patay na pag-abot sa Danao Provincial Hospital.

Matud ni SPO4 Renerio Masucol, imbestigador sa Carmen Police Station, gikan nagkuha si Sabayton sa jeepney stop sa iyang asawa nga gikan sa trabahuan sa Mandaue City ug nagsakay og motorsiklo pauli.

Sumala pa nga nabantayan sa asawa sa biktima nga si Chona ang duha ka mga lalaking luwan og motorsiklo nga nag-atang gibanabanang 150 metros gikan kanila ug sa pag-abot nila sa kurbadahong dalan ang angkas sa motorsiklo giingong mibunot og wala matinong kalibre sa armas ug mipusil sa biktima.

Human maigo nalup-og ang magtiayon apan inay mobiya giduol pa sa mga mamumuno ang biktima ug gitan-aw kung buhi pa kini ug pagkahuman daling mibiya sa dapit. Si Sabayton nadestino isip traffic enforcer sa National Highway sa Barangay Cogon East ug giingong police asset usab kini.

Nagtuo si Masucol nga ang motibo sa pagpamusil naay kalambigitan sa pagka-police asset ni Sabayton sanglit ubay-ubay na og naaresto ang kapulisan nga drug pushers tungod sa mga impormasyon ni Sabayton.

“Nag-text ni siya nako before nga naay murag naniid niya unya lain og tinan-awan ako lang siya giingnan nga ayaw lang pakita pirmi diha anyway hayag bitaw inig duty niya,” sumala pang Masucol.

Samtang  patay ang usa ka 39-anyos nga stone canvasser nga nagdiskarga og mga bato gikan sa trak diha sa sitio Hunob sa barangay Guadalupe sa siyudad sa Carcar niadtong Miyerkules sa ala 1:30 sa hapon.

Ang biktima nga patay nang nadangat sa tambalanan mao si Carlito Albarico, 39. Matud ni PO1 Mark Rosaroso, desk officer sa Carcar City Police Station dihang nahinabi sa Banat News  bisan natumba na ang biktima gisigehan pa gihapon kini og pusil una pa biyai sa kriminal

Gitabang sa mga tawo si Albarico apan patay na kini pag-abot sa Carcar City District Hospital. Nakaangkon og mga samad pinusilan sa tiyan, dughan ug ubang bahin sa lawas si Albarico nga nakaingon sa kamatayon niini.

Nakuha sa mga imbestigador diha sa crime scene ang napulo ka mga kabhang sa bala sa .9mm.

Ang kapulisan padayun pa sa ilang imbistigasyun ingon man pagsusi sa motibo sa krimen ug pagtumbok sa suspek apan gidudahang personal nga kasungian maoy hinungdan niini. (BANAT NEWS)