P22 usbaw sa suhulan

CEBU, Philippines - Giaprubahan kagahapon sa Regional Tripartite Wages and Productivity Board-7 ang dugang P22.00 matag adlaw sa minimum wage sa Central Visayas.

Kini maoy nakab-ot nga desisyon sa mga sakop sa board sa duha ka adlaw niining marathon hearing. Namatikdan nga walay sami nga napasar ang maong usbaw kay wala gyud maglalis ang mga representante sa mga negosyante ug sa mga mamumuo.

Si Jose Tomongha, usa sa mga labor representatives  sa maong board miingon nga ang dugang P22.00 matag adlaw sa suholan gamay ra kini kaayo itandi sa orihinal nga tinguha sa mga negosyante nga  walay increase.

Ang board gikatakdang magtigom pag-usab aron tukion ang final resolution nga ipadala ngadto sa National Wages and Productivity Commission aron paabrubahan.

Gipaabot nga pagkahuman sa tulo kad adlaw ibalik kini diha sa RTWPB-7 aron ipublikar ang resolution sa tanang pamantalaan. Si Tomongha kinsa mao usab ang tsirman sa Alliance of Progressive Labor (APL) nagkanayon nga maimplimentar ang maong bag-ong usbaw kinse ka adlaw human sa publikasyon.

Ang APL ug mga kaalyadong organisasyon sa mga mamumuo nangayo og P121.85 matag adlaw nga usbaw samtang ang Associated Labor Unions-Trade Union Congress of the Philippines (ALU-TUCP) nangayo usab og P94 nga usbaw alang sa mga mamumuo sa Region VII.

Apan ang lima ka mga kahugpongan sa mga negosyante dinhi sa Central Visayas kusganong mibabag sa dugang suhulan ug miingon nga kung ihatag nila kini daghang mga gagmay’ng negosyo ang manirado.

Ang maong lima ka kahugpongan sa mga negosyante mao ang Cebu Chamber of Commerce and Industry (CCCI), Mandaue Chamber of Commerce and Industry (MCCI), Employers Confederation of the Philippines-Cebu Chapter, Mepzcem Chamber, Inc. ug ang Confederation of Philippine Exporters -Cebu Chapter. Si ALU-TUCP vice president Ferdinand Jumapao miingon nga gamay ra kaayo ang maong usbaw.

"Gamay ra gyud na pero unsaon man dawaton na lang kay nagkinahanglan gyud ang mga workers ana nga increase," matud pang Jumapao. (BANAT NEWS)