Magtiayong negosyante gitulis
CEBU, Philippines - Moabot og P250 mil nga kwarta ang nasakiyo sa mga tulisan gikan sa usa ka seaman ug asawa niini diha sa barangay Balud sa lungsod sa San Fernando samtang paingon untang mangompra dinhi sa Sugbo alas 10:40 sa buntag niadtong Miyerkules.
Ang biktima mao si Fernando Gimena, 55 , ug asawa niining si Erlinda, 58, taga barangay Looc sa lungsod sa Oslob ug dunay dakong tindahan sa maong lungsod. Unom ka mga wala mailhing lalaking nagsakay og tulo ka motorsiklo nga pulos armado ang gitumbok nga mitulis sa magtiayon.
Matud ni PO1 Janel Figura sa San Fernando Police dihang nahinabi sa Banat News ang magtiayon sakay sa ilang pribadong cargo truck diha sa front seat nga gimaneho sa ilang drayber nga si Pablito Vequiso paingon mangompra.
Apan pag-abot nila sa maong lugar ang usa ka motor nga giluwanan og duha ka lalaki ang kalit mi-overtake ug gibabagan ang trak ug gitionan og armas ang drayber aron pahunongon.
Dihadiha nangabot usab ang laing duha ka motorsiklo nga pulos gihapon armado (usa niini armado og Ingram) ang mga sakay kinsa mimando sa pagtugyan sa ilang kuwarta.
Human niini miikyas ang mga tulisan padulong sa amihanang direksyon ug igo na lang sa pagdangop sa kapolisan ang magtiayon, base sa pasiunang imbestigasyon gidudahang posibleng may “inside job” nga nalambigit sa hitabo tungod kay suhito kaayo ang mga tulisan. (/EIM) (BANAT NEWS)
- Latest
