130 ka pakete’ng shabu sakmit

CEBU, Philippines - Mikabat  sa 130 ka pakete  nga shabu  nga  nagkantidad og  P250,000 nasakmit  sa mga operatiba sa Philippine Drugs Enforcement Agency (PDEA)-7 gikan sa usa ka suspetsadong  drug pusher   didto  sa Sitio Hawud, Barangay Bulacao, dakbayan  sa Talisay  kagahapon  sa   kaadlawon.

Ang   suspetsado  nga  naghupot  sa nagkalainlaing  gidak-on  sa  mga  pinutos  sa   plastik   nga  shabu  mao  si Gerald Joy “Intsik” Baguio , 24,  nga  molupyo  sa  maong  lugar.

Ang mga ebidensiya   nga nasakmit  sa  mga  sakop  sa  PDEA naglangkob sa walo ka dagkong pakete, duha ka medium nga pakete ug 120 sa gagmay’ng pakete sa shabu.

Gawas  niini  nasakmit usab  sa mga otoridad ang  mga deposit slip sa gidepositong  kuwarta  nga nagkantidad og kapin sa  P3 milyones , ingon  man  ang P3,000 nga marked money  o kuwarta  nga    paon  ug nagkadaiyang drug paraphernalia  kon  mga  gamit  sa paghingos  og  shabu.

Ang mga nasakmit  nga shabu gihatud  dayon  ngadto   sa Philippine National Police Crime Laboratory-7 alang sa chemical analysis.

Si Jessie Tabanao, PDEA-7 spokesperson nagkanayon nga si Baguio gipanid-an  sa taga PDEA  sulod  sa kapin   usa  ka  buwan.

Human  matino  sa taga  PDEA  nga positibo  na  ang  tanan,  gilusad  dayon  nila  kagahapon  sa alas 3:15  sa kaadlawon  ang buy bust operation  nga  gipangunahan  ni  PDEA7 Regional  Director   Jigger Montallana.

Sa  milabay  nga  mga  buwan  giingong mipahigayon   og  operasyon  ang  mga sakop  sa  PDEA   batok kang Baguio apan gumikan sa  iyang  kadangog  nakaikyas kini.

Ang mga operatiba mitug-an nga naglisod sila sa pagdakop kang Baguio kay gumikan  sa  kaidlas  niini , dili makig-transaction sa dili niini kaila.

Apan pinaagi sa usa ka asset nga amigo sa suspetsado napahigayon gyud ang operasyon sa  PDEA kansang  transaksyon didto ipahigayon duol sa usa ka establisemento  sa Barangay Bulacao.

Pinaagi  sa paon  nga  P3,000, napalitan gyud sa operatiba og usa ka medium nga pakete sa shabu si Baguio nga misangpot  sa pagkasikop niini.

Si Baguio nga giingong lima na ka buwan sa maong illegal nga patigayon mohalin og usa ka kilo nga shabu nga mokantidad og P5 milyones  matag semana

Ang maong mga drugas gikan sa Manila ug ang iyang kontak   didto  mao ang iyang amahan nga si Benjie Baguio.

Si Benjie  natanggong   karon  sa New Bilibid Prison sa Muntinlupa City tungod sa kasong murder.

Si Tabanao midugang nga si Baguio usab ang nag-supply og drugas sa upat ka lungsod sa amihanang Sugbo ug laing upat ka lungsod sa habagatan.

 “Daghan man ni siya og bataan sa lugar nga maoy muhatod sa usa ka bulto ngadto sa south ug sa norte.” Sa laing interview, si Baguio miangkon  nga siya  gayud maoy  tag-iya  sa maong  shabu  nga  gi-supply  kaniya  sa  iyang amahan  nga  napriso  sa Muntinlupa.

 “Gikan sa Manila unya ngari ra nako gikuha sa Cebu gipadala,” matud niya.

Ang  suspetsado gibalhug dayon   sa prisohan  sa PDEA-7  ug kasong kalapasan sa Sections 5, 11, ug 12 sa RA 9165 or Dangerous Drugs Act of 2002 ang ipasaka batok kaniya. (BANAT NEWS)