Una pusila sa kontra nasumbagan sa laing tawo

CEBU, Philippines - Nalandig sa tambalanan ang usa ka 21 anyos nga lalaki human kini pusila sa duha ka wala hiilhing tawo niadtong Lunes sa gabii didto sa sitio Mananga 2, barangay Tabunok, dakbayan sa Talisay.

Apan sa wala pa mapusili ang biktimang si Victor Bayotlang, residente sa lungsod sa Consolacion, nasukmagan  sa tag-iya sa balay nga iyang gisudlan.

Si Bayotlang nga nakaangkon og mga samad pinusilan sa tuong bitiis, walang bukton ug ilawom sa bukton daling gidala ngadto sa Vicente Sotto Memorial Medical Center sa Talisay Rescue Emergency Action Team (TREAT).

Sa imbestigasyon nila ni PO3 Benedicto Lasque ug PO3 Ferdinand Pablo nga sa wala pa mahitabo ang maong insidente ang biktima naglingkod kini sa gawas sa Internet Café nga gipanag-iya ni Longina Caballero, 45, residente  sa Mananga 2.

Duha ka wala mailhing mga lalaki  kalit lang mitungha ug nagpaingon ngadto sa nahimutangan sa biktima.

Ang biktima daling misulod sa balay ni Caballero aron makalikay sa maong mga lalaki, apan ang kapuyo ni Caballero nga nailhan lang sa ngalan nga “Kokoy”  nakalitan  tungod kay wala siya makaila kang Bayotlang.

Sa pagtuong dautang tawo si Bayotlang, gisukmag kini ni Kokoy hinungdan nga ang biktima midali og gawas sa balay.

Apan pila ka minutos sa paggawas sa biktima gikan sa balay,  adunay mga buto sa armas ang nabati ug ang biktima nagbuy-od na kini  sa yuta  nga naligo na sa kaugalingong dugo.

Ang nahisgutang duha ka wala mailhing mga lalaki dali   nga mibiya sa lugar human og pamusil.    

Gituohan sa mga polis nga personal nga bangi ang hinungdan sa maong hitabo.

Napunitan sa mga polis gikan sa lugar nga nahitaboan ang usa ka pitaka nga adunay marka nga “bolo”, nga dunay sulod nga litrato sa usa ka bata  sa jacket sa driver’s license, itom nga bull cap nga adunay green nga marka ug usa ka   nalumping na nga  bala.

Ang kapolisan nagpahigayon  pa karon og follow-up operation sa maong insidente. (BANAT NEWS)