‘Wanted’ napusilan angol

CEBU, Philippines - Kritikal ang kahimtang sa usa ka wanted nga tulisan human kini pusila  didto sa Sitio Bogo, barangay Pulpogan, sa lungsod sa Consolacion niadtong Lunes sa alas 11:30 sa gabii.

Ang biktima mao si Linton Pajaron, 34, ulitawo,   nga nagpuyo sa maong lugar ug wanted sa  kapolisan sa kasong robbery. Samtang ang suspek nailhan lang sa mga saksi nga si Richard nga taga  barangay Pasil,  sa dakbayan sa Sugbo.

Si PO1 Ardian Balanay sa Consolacion Police Station mibutyag  sa Banat News  nga sa  wala pa    pusila ang biktima giingong   nagpalit  og halo- halo sa tindahan sa iyang pag-umangkon nga si Gerson Guaca.

Apan tungod kay gihimo pa ang halo- halo, milakaw ang biktima paingon sa pinuy-anan ni kapitan Roger Linabok nga iyang brother-in-law nga dili layo sa tindahan.

Apan dihang mibalik na siya  sa tindahan  aron pagkuha sa halo-halo gisugat kini sa suspek dayon gipusil sa makadaghang higayon ug dihang nakita nga natumba na, misibat  dayon  ang  kriminal.

Ang biktima gidali   dayon sa Vicente Sotto Memorial Medical Center  (VSMMC) ug padayong giatiman sa mga doktor apan arestado na ug gwardyado sa mga polis.

Kini human masuta nga adunay warrant of arrest ang biktima sa kasong robbery nga pending sa ilang buhatan.

Ang kapolisan nga mirespondi nakapunit   og upat ka kabhang sa bala sa kalibre .45 ug usa ka lumping   nga gituohang gikan sa armas sa suspek.

Padayon pa ang  kapolisan pag-ila sa suspek ug ang motibo sa kremin. (BANAT NEWS)