Blocktimer gihulga misumbong sa polis

CEBU, Philippines - Midangop kagahapon  sa kapolisan  ang usa ka babaye   nga blocktimer sa dyLA Radio   human  kini makadawat og hulga   gikan sa usa  ka body guard  sa usa ka politiko  kinsa misiko usab   kaniya.

Si  Nanette Garong, 40,  maoy  nagdumala sa programa  sa Bando Osmeña Pundok Kauswagan (BOPK) nga gipalanog  sa DYLA  misaysay nga samtang padulong siya sa announcer’s booth nasugatan niya  ang  usa  ka   lalaki nga giila niya nga si Arnold Timtim ug mitulisok kaniya dungan sa pag-ingon   nga  “Gabasa lang nang baba nimo, bantay lang ka sa silong!”

Matud pa ni Garong nga bodyguard si Timtim sa konsehal sa Barangay Ermita nga si Felicisimo Imok Rupinta kinsa kandidato usab pagka-konsehal alang sa umaabot nga piniliay ubos sa Team Rama. Nasayran  niya nga nagtrabaho usab si Timtim isip tanod sa Ermita.

Suma pa ni Garong  nga guest si Rupinta sa gisundan niya nga programa sa dyLA hinungdan nga nagkaabot gyud ang tagsa-tagsa nila ka kampo.

“Wala ko kasabot sa akong gibati, nangurog ko og maayo kay puros gyud sila mga lalaki,” suma pa ni Garong kinsa misaysay nga dali siya nangayo og tabang ngadto sa station manager sa dyLA nga si Jun Tagalog.

Gitambagan si Garong nga mopadayon sa iyang  programa ug  pagkahuman  niini  mikanaog  siya  sa silong dihang   nasugatan na usab niya ang grupo ni Rupinta sa hagdanan ug gisiko siya ni Timtim hinungdan nga naigo ang iyang dughan  nga  nakapugos  kaniya  sa  pagdangop ngadto  sa Waterfront Police Station.

Dugang pa ni Garong nga gusto  usab niya nga ipaimbestigar ang polis nga nagsuwat sa blotter  kay wala  man  isuwat  ang nahitabo sa hagdan ug siya na hinuon ang gireklamo sa kampo ni Timtim.

Samtang gipasanginlan usab ni Garong ang laing blocktimer  nga si Chit Beltran Ortiz nga nagpataka og estorya  kinsa  miingon  kuno  nga "Kaila ko nimo, SK ka! Kawatan ka!" .

Dali nga gihimakak ni Ortiz ang maong   pasangil ni Garong.

Hinuon  mitug-an   si  Ortiz nga wala siya makadungog nga nanghulga si Timtim  kang Garong  ug  midugang  siya  nga si Garong ang maoy   adunay dili maayong binuhatan samtang nagprograma siya sa radyo. "Si Nanette sige la’g saba-saba, sige’g tawag sa telepono bisa’g kahibaw siya nga mogamit mi para sa among phone-in guest. Ug mogawas siya ibundak gyud ang pultahan," suma pa ni Ortiz.

Apan si Garong sa iyang bahin, desidido gyud  nga  mopasaka og kaso   batok  kang Timtim. (BANAT NEWS)