National Organic Agriculture Congress gibuksan

CEBU, Philippines -  Ang  pagpaila  sa organic  farming maoy  tumong  sa gipahigayong tulo ka adlaw  nga 9th National Organic Agriculture Congress (NOAC) nga gibuksan didto sa JCenter Mall sa syudad sa Mandaue  sugod kagahapon

Si Secretary Proceso J. Alcala sa Department of Agriculture kinsa maoy  dinapit  nga  mamumulong mibutyag nga gusto niyang ipasagop sa tanang mga mag-uuma sa nasud ang  organikong pagpananom.

Matud  pa  ni  Alcala  nga  usa  kini  sa  mga  paagi  aron gawas  nga  makabaton  og  himsog  nga  panglawas  ang  katawhan matibhangan  usab  ang epekto  sa climate change  nga  mosangpot  sa global  warming.

Dugang pa niya nga bisan  dili pa kaayo hanas ang mga mag-uuma sa paggamit sa organikong  abuno itandi   sa komersyal nga abono  apan nalipay  siya tungod sa mainitong tabang sa nagkadaiyang mga magpapatigayon ug sa tanang opisyales sa Department of Agriculture (DA) sa matag rehiyon kinsa  naningkamot nga  makakat-on  ang  mga  mag-uuma  sa pagsagop  sa organikong  pagpanguma.

Gumikan  niini milaum si Alcala nga  molampos  ang  nasud  sa programa  niini nga sa tuig 2013 mahimo  na  nga self sufficient rice producer ang Pilipinas. Kini  ang katumanan  sa gipangandoy  sa kagamhanan  nga  putlon na  sa  hingpit  ang pagpangompra  og  bugas  humay  didto  sa gawas kay igo  naman  kaayo  nga  makasuporta  sa  95 milyones  nga  populasyon  sa Pilipinas  ang  kaugalingong produksyon  sa  atong  kaumahan.

Ang NOAC  nga  molungtad  hangtod ugma,  gitambungan  usab ni Senador Francisco “Kiko” Pangilinan kinsa  mipasalig  nga  kung kahatagan siya og laing higayon nga makalingkod pagbalik sa senado, dili gayud siya magpanuko sa pagsugyot  og  dugang  budget alang  sa organic  farming alang  sa mga  mag-uuma  nga  mosagop  niining matang sa panguma.

Samtang sa bahin ni kanhi chairperson  sa Movie and Television Review and Classification  Board (MTRCB) Grace Poe Llamanzares,  nga maoy  gipiyalan  ni  Presidente  Benigno Aquino  sa pagpadangat  sa iyang  mensahe  sa pagbukas kagahapon  sa tulo ka adlaw  nga NOAC, mibutyag sa Banat News kagahapon   nga  importante kaayo  ang pagkaon  og  mga organikong  mga produkto  sa kaumahan alang  sa  mga  maayong  panglawas  sa mga Filipino.

Iyang  gibutyag  nga  ang  kasamtangang  gisagop  sa  mga  mag-uuma  nga  abunong kemikal  maoy  nahimong  sinugdanan  sa  mga  sakit  nga kanser  nga  sayon kaayong mokutlo  sa kinabuhi.

Iyang  gipasabot  nga  sa organic farming, dili pinugos  ang  pagpatubo  sa tanom  lahi  sa conventional  farming nga  mosagop  sa kemikal  nga abuno  nga  kusog tuod  motubo  ang  tanom  apan  ang epekto  sa iyang kemikal  motuhop  usab  sa lawas  sa tawo  nga  makakaon  sa bunga  sa maong  tanom. (BANAT NEWS)