Motor misaliring 3 angol

CEBU, Philippines - Tulo  ang  naangol dihang   nalimbuwad ang  gisakyan nila nga motorsiklo nga gimaneho sa usa ka hubog  nga  driver  didto sa highway sa barangay Tambuang, lungsod sa Dumanjug  niadtong Lunes sa alas 9:10 sa gabii.

Ang mga naangol mao si Allan  Benondo, 24, taga  Poblacion, lungsod  sa  Barili ug drayber  sa  motorsiklo  nga Yamaha color blue, Modesta Carraza, 48, ug Dionisia Benondo, 58 , pulos minyo,  nga managsilingan  sa   Barili.

Si PO3 Dionisio Tagopa sa Dumanjug Police Station mibutyag  sa Banat News   nga ang mga biktima gikan sa Dumanjug proper ug mibiyahi paingon sa lungsod sa Ronda.

Apan  bisan  hubog  sa ilimnong makahubog  ang  driver  giingon  nga  kusog  kaayo   kining mipadagan  sa iyang  sakyanan nga  gisakyan  sa duha  ka  babaye  nga  pulos  walay helmet.

Giingon  nga  sa  pag-abot sa maong lugar kalit lang misaliring ang motorsiklo  kay  wala  na  kapanimbang ang    drayber  ug gituohan  nga  diha  na  kini  sa hilabihang  kalipong  sa bino  nga  iyang  gilala.

Nangalabay ang duha ka babaye  uban  sa  drayber  nga nagdungan  og kahagba  uban  sa motorsiklo  sa sementadong  karsada.

Gumikan  sa mga samad  ug  bun-og  sa ilang kalawasan naglisud  sila  sa  pagbangon  dayon.

Hinuon  ang  mga  estambay  sa maong  lugar  mao  nay mitabang  kanila  ug  gihatud  sila  dayon  ngadto  sa  Barili District Hospital.

Ang kapolisan  sa lungsod nagpaabot  nga  mopasaka  og reklamo  ang  mga  biktimang  pasahero  batok  sa drayber  sa  motorsiklo  nga  ilang  gisakyan   gumikan sa kalasbag  sa bino  samtang  kini  nagmaneho  sa iyang  sakyanan. (BANAT NEWS)