Tulo ka hepe girelibohan kay palpak kontra sugal

CEBU, Philippines - Tulo ka mga hepe gikan sa Sibonga, Pinamungajan, ug Mambaling Police Station sa Cebu City Police Office ang gipangrelibohan gikan sa ilang mga pwesto ni Police Regional Office (PRO)-7 director Marcelo Garbo tungod sa ilang palpak nga kampanya batok ilegal nga sugal.

Nasuta kini ni Garbo dihang mipahigayon og operasyon ang Regional Public Safety Battalion sa maong mga lugar ug nakadakop og ushers sa swertres ug nakakaplag og mga video karera machines samtang ang maong mga police chiefs wala makahimo niini. Ang maong mga hepe giila nga sila si Insp. Raymundo Enriquez, sa Pinamungajan Police Station, Insp. Wilfredo Tautoan, sa Sibonga Police Station, ug Chief Insp. Clyde Esguerra, sa Mambaling Police Station.

Si Garbo mitug-an nga ang operasyon sa swertres didto kini mahitabo sa lungsod sa Pinamungajan ug Sibonga samtang ang mga video karera didto kini masakmit sa Mambaling.

“Nahulihan natin sila sa area nila operated by the RPSB and we are serious in our campaign against illegal gambling,” matud ni Garbo. Ang Cebu City Police Office ug ang Cebu Provincial Police Office wala pa makadawat og pormal nga kamanduan gikan sa PRO-7.

Apan kung si Sr. Supt. Patrocinio Comendador, CPPO director, mao ang pasultion sila si Enriquez ug Tautoan maayo og performance isip hepe sa maong mga police station ug motuman kini kung unsa man ang iyang direktiba.

“I see their accomplishments if suguon sila mutuman man pero mao may order sa higher headquarters wala tay mahimo but to follow,” matud ni Comendador.

Matud ni Comendador nga dili sayon ang pagdali sa pagwala sa maong matang sa sugal apan hinay-hinay kini nilang gipaningkamutan.Dili pa dugay dihang 24 ka mga hepe sa kapulisan sa lungsod ang gipadad-an og memorandum ni Comendador tungod kay wala makahimo og operasyon batok sa ilegal nga sugal. Apan ang maong mga hepe nakasumitir na sa ilang mga rason sa wala pa maabti og 48-oras nga gihatag kanila ni Comendador. (BANAT NEWS)