Polis mihimakak sa pasangil nga tigpayuhot siya'g drugas

CEBU, Philippines - Gihimakak sa sakop sa Special Reaction Unit (SRU) ang pasangil nga siya usa sa posibling tigpayuhot og illegal nga drugas sa lungsod sa Balamban.

Kini  maoy   gibutyag  ni kapitan William Genel sa  barangay  Gaas, lungsod  sa Balamban   sa pakighinabi  sa Banat News kaniya.

Gitug-an  ni Genel  nga  iyang  gipatawag ang police  kansang  ngalan  wala  niya ibutyag, nga maoy gitumbok   nga suspetsado  sa pagpalusot  og  illegal  nga  dugas  sa maong  lugar.

Matud pa ni Genel nga ipaatubang  usab  niya  ang  mga tanod  lupon  ug  konsehal  sa maong  imbistigasyon uban  sa polis  nga  ilang gipasanginlan, apan  mibahag ang ikog  sa nahisgutang mga opisyal  sa barangay   ug  wala  na  makahuygo  sa ilang pasangil  ngadto  sa maong  polis  nga  ilang  kaatubang  gumikan sa kalisang.

Hinuon  miingon  si  Genel nga karong adlawa iyang ipatawag og balik ang iyang konsehal nga nakakita sa tulo   nga  mao  ang  usa  ka tanod, usa  ka sakop  sa lupon ug usa ka police  nga naghithit  og gituohang  shabu.

Lakip usab nga ipatawag  niya   mao ang iyang tanod nga gikauban  sa police   sa maong  pot session.

Gibutyag usab ni Genel nga nakigkita kaniya si Sr. Supt. Patrocinio   Comendador, ang hepe sa kapolisan sa lalawigan sa Sugbo,  ug  ilang  gituki  ang  maong  kaso. 

Ang nahisgutang polis   nga nadestino sa provincial headquarters  padayon  usab   nga giimbestigar sa  iyang  mga  opisyal bahin  sa mga  alegasyon batok kaniya.

Sayo  niini mibutyag si Police Regional Office, Regional Director Marcelo Garbo nga iyang gipa-imbestigar ang maong taho  kay dili siya gusto nga may  mga  polis  nga  badlungon  sa ilang  organisasyon.

Ang unang  misumbong  niini  mao mismo  sa Genel  tungod  kay  gawas  sa maong  polis  sa SRU, may lain usab  nga  police trainee  nga giingong tiggamitan  gihapon  og  gidiling  drugas sa  Gaas  ug  dili  siya gusto  nga  pasanginlan  siya  nga   gipasagdan  niya  kining  kasoha.

Gawas sa tanod, ug sakop sa lupon adunay kapin kun kulang napulo ka mga tawo   nga  nailhan  nga tiggamitan ug tigbaligyaan usab  og  ginadiling drugas didto  sa  perimeter fence sa Regional Training School  sa Gaas.

Matud  pa  ni Genel nga  kadaghan  na  niya  pasidan-i  ang  mga hingtungdan  ug  gibaharan  niyang  ipapriso  kun  dili  patuo. (Lesley Caminade-Vestil/WC)(BANAT NEWS)