Taga Mabolo mangayo’g extension sa mayor

CEBU, Philippines - Ang Nursery Urban Poor Association Incorporated gitakdang moatubang kang Mayor Michael Rama karong  adlawa aron muhangyo nga hatagan sila og ekstensyon nga makapuyo sa ilang nahimutangan karon sa Barangay Mabolo hangtud sa Abril sa sunod tuig.

Suma pa sa presidente sa maong asosasyon nga si Jefrey Zapanta nga andam sila mohawa sa ilang nahimutangan apan dili pa karong panahona sanglit  nagtungha pa ang ilang mga anak.

Busa hangyoon nila ang mayor nga  unya na  sila  mohawa sa ilang gipuy-an sa  sunod tuig inig tak-op  na  sa klase  sa mga tulunghaan.

Nasayran nga 32 ka  pamilya  nga  namuyo sa luna  dapit sa nahimutangan sa karaang nursery sa kagamhanan  sa siyudad sa Sugbo  sa Barangay Mabolo  gipadad-an  na og notisya nga papahawaon na sila sa ilang giistaran gumikan kay  gamiton na  sa gobiyerno  ang maong luna. Gipanag-iya ang maong luna sa kagamhanan sa siyudad ug padayunon  sa kagamhanan  ang  paghimo  sa maong  lote  nga nursery.

Matud pa ni Zapanta nga dili sila gusto nga maapektohan ang pagtungha sa ilang anak ug labaw  sa tanan ang uban kanila wala pa’y ideya kun asa sila mobalhin. Adunay uban kanila nga nagtrabaho  labing maapekto  sa maong  demolisyon  busa  takus  ug makatarunganon  nga  muhangyo  sila  sa kagamhanan  aron iangan-angan  una  ang  maong lakang  sa pagpabalhin  sa nagpuyo sa  maong dapit  aron  dili  sila  makalitan.

Suma pa niya nga ang Division for the Welfare of the Urban Poor (DWUP) mitanyag kanila og relocation site sa Sitio La Guerta, Barangay Lahug niining dakabyan. Dugang pa ni Zapanta nga sibo ra usab ang panahon hangtud sa Abril nga makahatag sila og oras sa pagsuta sa relocation site nga ihatag sa siyudad kanila. (Sanden J. Anadia/WC)(BANAT NEWS)