Environment code pirmado na

CEBU, Philippines - Higpit na nga ipatuman sa  kagamhanan ang Cebu Provincial Environment Code nga gitumong sa paghan-ay og mga sumbanan   sa pagkontrolar  sa mga kalihokan nga makadaut sa  kalikopan sa lalawigan.

Si Board Member Thadeo Ouano sa ikaunom nga distrito sa lalawigan sa Sugbo nga maoy nangamahan sa maong ordinansa  miingon nga  ang  pagpatuman  niini  sugdan  na  human pirmahi   ni Gobernador Gwendolyn Garcia ang nahisgotang ordinansa.

Apan  sa  dili  pa  kini  ipatuman  imantala  una  kini   sa mga nag-unang pamantalaan dinhi sa Sugbo  sulod sa tulo ka magsunodsunod  nga  adlaw ug  dayon moihap  pa  og  15 diyas  una  kini  hingpit  nga  moepekto.

 “I’m happy that the environment code has already been signed by the governor,” ni Ouano pa sa iyang pamahayag. “This  is the fruit of our labor in the past two years.Dugang pa niya nga milungtad gayud og duha ka tuig ang iyang pagpanday sa maong ordinansa tungod kay daghan man kaayo ang kinahanglan nga himoon nga naglakip   sa  pagpahigayon og public hearing ug pagkuha sa baroganan sa grupo sa mga tawo nga hingtungdan niini.

Matud pa ni Ouano nga ubos sa maong ordinansa   gidili ang pagkubkob o pagpanguha og bas ug  graba   gikan  sa kasapaan  o kaha  kabaybayonan   aron   ibaligya ngadto sa gawas sa nasud.

Gipasabot ni Ouano nga ang maong code nga  naaprobahan sa hunta probinsiyal sa regular session niini niadtong Oktubre 20 niining tuiga maoy ilang giisip nga Biblia nga tamdanan sa paghatag kasiguroan nga dili maguba ang atong kalikopan sa lalawigan.

Sa Section 10 sa maong code   gitataw  ang pagpahamtang   sa silot nga gipahaum usab sa Republic Act 8550 kon Fisheries Code of the Philippines.

Usa  sa  mga  silot  mao  ang  pagbayad og P3,000 nga multa sa  matag cubic meter sa bas, anapog ug graba nga ilegal  nga gihakot sa malapason. (Romeo T.  Limpangog/WC)(BANAT NEWS)