“Kwarta sa Basura” gilusad sa DSWD

CEBU, Philippines - Mokabat sa 50 ka mga kababayen-an nga benepisyaryo  sa Pantawid Pamilyang Pilipino Program (4Ps) sa gobiyerno  bag-ohay lang nabansay-bansay sa proyektong "Kwarta sa Basura"  usa  ka bag-ong matang  panginabuhian  nga gipaila sa Department of Social Welfare and Development (DSWD-7) sa pakig-alayon sa Department of Environment and Natural Resources (DENR-7) ug usab Local Social Welfare Office sa syudad sa Sugbo.

Kining maong mga kababayen-an nga gikan sa  kabarangayan gitudloan sa pagpanggama  og mga placemats, mga bag, pitaka, mga vase, mga duwaan ug uban pang mga accessories sa kababayen-an nga gikan sa daang newspaper, magazine, tetra pack, daang phone directories ug uban pang mga materyales gikan sa mga butang nga mahimo pang ma-recycle. 

Matud pa ni Jaybee Binghay, tigpamaba sa DSWD-7 nga ang grupo sa napulo ka mga babaye nagagikan sa lima ka barangay sama sa Mambaling, Inayawan, Sawang Calero, Duljo-Fatima ug Kalunasan sa syudad sa Sugbo.

Sila mao  ang giila sa DSWD-7 nga  mosalmot sa  pagpanggama  sa bag-ong matang handicraft alang sa ilang Sustainable Livelihood Program (SLP).

Dugang pa niya nga sa wala pa ang aktuwal nga demonstrasyon sa paghimo og recycled nga mga bag, mga folder ug usab paper beads, si Esmeralda Casino nga usa ka espesyalista sa DENR-7 mihisgot sa epekto sa pag-usab-usab sa kahimtang sa panahon ug usab sa Global Warming  nga  nakapausab  sa dagan  sa panginabuhi  busa gipaila sa kagamhanan  kining  kinabus  nga matang  sa panginabuhi.

Samtang si Barangay Captain Maynard Salinguhay sa Barangay Luz sa syudad sa Sugbo mipaambit usab sa ilang maayong naandang gimbuhaton  bahin sa Solid Waste Management Program diin nakapahimo kanila nga inila isip champion sa Solid Waste Management.

Gipadayag ni Binghay nga ang SLP usa ka epektibong programa sa gobiyerno nga napamatud-ang makatabang sa pagbatok ug pagsulbad sa kakabus.

Matud pa niya nga ang seed capital nga P125 hangtod P150 ka libo ka pesos maoy gigahin  sa kagamhanan  alang  sa maong grupo nga naglangkob sa 25 hangtod sa 30 ka miyembro

Lain  usab  nga  grupo  nga  gitudloan  sa  kinabus  nga  panginabuhi  ang  gihatagan  usab  og puhonan  sa kagamhanan sa pagpadagan og  mga  sari-sari o rolling stores, pagpanahi og mga sapot, pagpanguma, pagpamuhi  og  kahayopan, pagpangisda, pagproseso og pagkaon, shell craft ug usab pagpamaligya og isda nga  bayaran  sa miyembro sulod sa duha ka tuig nga walay kolateral og usab tubo. Gibutyag ni Binghay nga ang kanhing Self Employment Assistance-Kaunlaran (SEA-K) nga gitawag na karon nga Sustainable Livelihood Program sa DSWD nakatabang  kaayo  sa  mga kabus nga nahimong benepisyaryo  niini. (Liezl M. Frasno-correspondent/WC) (BANAT NEWS)