San Pedro calungsod

CEBU, Philippines - Unang Triduum Mass sa Cebu anha sa Guadalupe himuon

Anha ipahigayon sa Archdiocesan Shrine of Our Lady of Guadalupe sa barangay sa Guadalupe sa dakbayan sa Sugbo ang unang Triduum Mass ni San Pedro Calungsod karong Nobiyembre 27. Sumala pa sa presidente Parish Youth Coordinating Council- Guadalupe nga si Dean Sagrado nga gipangandaman na pag-ayo sa mga parokyano sa ilang dapit ang pag-abot sa imahe ni San Pedro Calungsod nga kasamtangang gilibot sa nasud sa gihimong “Duaw-Nasud.” Nagkanayon si Sagrado nga makig-alayon sila sa mga opisyales sa Barangay Guadalupe ug sa kapolisan alang sa hingpit sa seguridad tungod kay gipaabot nilang liboang mga debotos unya ang gipaabot nga modagsa sa ilang parokya sa maong adlaw.

Himuon usab ang usa ka live drama presentation kalabot sa kinabuhi ni Pedro Calungsod ini’g kagabii sa maong petsa.

Ang maong duwa sa entablado pagasalmotan sa mga kabatan-onan gikan  sa Guadalupe, Pardo ug Munisipyo sa Argao ug ubos kini sa direksyon sa mangsisibya nga si Aljin Abaquita.

Himuon usab ang live concert nga  salmotan sa mga local singers kung diin mga Christian songs ang idalit niini.

Sumala pa ni Sagrado nga ilaha gyud kini nga gipangandaman sanglit ang ilang parokya maoy unang destinasyon sa pagbalik sa imahe niini sa Sugbo busa mahimo na kini nga parte sa kasaysayan.

Nasayran nga dugay nang nag-debosyon ang kabatan-onan sa Guadalupe kang San Pedro Calungsod sukad niadtong beato pa lang kini.Gihimo nila ang debosyon pinaagi sa pag-ampo matag Sabado busa dakong garbo alang kanila nga hingpit na gyud nga nahimong santos ang giila nga patron sa mga batan-on.

Samtang ang National Thanks Giving Mass himuon usab diha sa South Road Properties karong Nobiyembre 30. (Sanden J. Anadia/EIM)  (BANAT NEWS)