Drug test sa drayber 17 sakpan

CEBU, Philippines - Pwerteng daghana na g’yud karon sa mga drayber sa mga pampubliko nga sakyanan nga mogamit og gidili nga matang sa drugas ug nakahatag og kapeligro sa mga sumasakay.

Atol sa laing kinalit nga roadside drug testing nga gihimo sa Land Transportation Office (LTO) ug mga sakop sa Task Force Alpha niadtong miaging Martes, 17 ka drayber ang nasuta nga migamit og gidili nga matang sa drugas.

Matud ni LTO-7 Assistant Regional Director Arnel Tancinco nga ang 16 namatud-an nga positibo sa shabu ug ang laing usa namatud-an nga migamit og marijuana.

Kadaghanan sa maong mga drayber miangkon nga mogamit sila og gidili nga matang sa drugas tungod sa pagtuo nga pinaagi niini magpabilin sila nga dili magduka nga magmaneho sa sakyanan.

Ang mga lisensya sa maong mga drayber wala na ibalik kanila ug kun sa confirmatory test mamatud-ang positibo gyud sila nga tiggamitan og gidili nga drugas, suspensohon ang ilang lisensya ngadto sa tulo ka buwan.

Dunay uban sa mga drayber nga mirason nga aduna sila’y giinom kanunay nga tambal tungod sa ilang sakit mao nga naa-an sila nga tiggamitan og shabu.

Apan ang mga medical experts miingon nga lahi ang resulta sa mga mogamit og natural nga drugas kay sa mga tigamitan og shabu ug marijuana.

Ubos sa bag-ong lagda sa LTO nga gilatid sa Administrative Order 2008-039 nga multahan og P10,000 ang mga drayber nga mamatud-an nga migamit og gidili nga matang sa drugas.

Ang balaud usab naglatid nga kun ang maong mga drayber molukat og bag-ong lisensya aron lang gayud makamaneho pagbalik og sakyanan, mahimo sila nga mamultahan kun masakpan. (BANAT NEWS)