Provincial SK naaksidente

CEBU, Philippines - Anak ni Bokal Wilfredo Caminero nga presidente sa Sangguniang Kabataan sa Lalawigan sa Sugbo nasugamak og aksidente samtang nagmaneho sa iyang sakyanan  kagahapon sa buntag diha sa barangay Binlod lungsod sa Argao.

Si Aladin Williamie Caminero, 19,  nalandig sa South General Hospital tungod sa naangkong kadaot sa kalawasan human madasmag ang gisakyang Ford Everest SUV niini.

Sa pakighinabi sa Banat News sa hepe sa kapolisan sa lungsod sa Argao, Insp. Alejandro Batobalonos patubang sa barangay Taloot ang batan-ong Caminero kauban ang tulo ka higala nga nailhan lang sa mga ngalang Michael, Clint ug Joal.

Sumala pang Batobalonos pag-abot sa maong dapit dunay usa ka van nga padulong mosulod sa usa ka gate maong milihay si Caminero apan nakugang kini sa kalit nga pagkasaghid nila sa 13-anyos nga kalit mibutho sa ilang agianan.

Tungod niini nawad-an og control si Caminero ug nalahos sa punoan sa kahoy ug didto nasampak. Daling gitabang gikan sa pagkapiit sa sakyanan ang mga sakay sa SUV sa mga sakop sa barangay  Binlod ug gidala sa maong tambalanan. 

Si Board Member Caminero nga nahinabi sa Banat News mibutyag nga anaa sa Intensive Care Unit (ICU) ang iyang anak. Sumala pa niya padulong unta mangaon og pamahaw ang iyang anak diha sa pantalan sa barangay Taloot  niadtong tungora. (BANAT NEWS)