CEBU, Philippines - Sobra sa P4 milyones ang kantidad sa mga alahas ug kwarta ang nadala sa wala mailhing mga kawatan nga milungkab sa usa ka balay diha sa Alpha Executive Homes sa barangay Lawaan III, dakbayan sa Talisay.
Ang maong insidente nabantayan ni Mineses Torres, 56, niadtong Huwebes sa hapon ug misumbong dayon sa kapolisan.
Sa imbestigasyon ni SPO1 Edgar Causon nasuta nga migamit ang kawatan og screw driver pagtangtang sa bintana sa kwarto sa anak nga babaye ni Torres sa ikatulong andana.
Gikuha sa kawatan gikan sa master’s bedroom ang mga alahas ni Torres nga nagkantidad tanan og P4 milyones, kwarta nga $17,000 ug P103, 000 cash.
Usa sa mga gwardiya sa maong subdivision nga si Rodolfo Briones nga nahinabi sa mga tigbalita kagahapon nagkanayon nga atoa sa Baguio ang asawa ni Torres ug ang mga anak niini wala usab diha sa ilang balay samtang si Torres atoa sa sam-ang niadtong higayona. Dunay katabang nga lalaki ang banay’ng Torres apan adunay gisugo kaniya nianang pagkahitabo.
Base sa pagsubay sa mga imbestigador mikatkat sa punoan sa mangga ang kawatan dayon mitapon sa paril sa balay ni Torres. (BANAT NEWS)