Wanted napatay

CEBU, Philippines - Patay ang usa ka wanted sa kasong rape nga giingong mipusil sa hepe sa kapolisan sa lungsod sa Compostela nga mi-serve sa iyang warrant of arrest diha sa ilang lugar sa sitio Aggies sa barangay Poblacion, lungsod sa Compostela kagahapon sa kaadlawon.

Ang suspetsado nailhan nga si Jay Niño "Bato" Udtohan alyas Baho, molupyo sa maong lungsod nga giingong sakop sa usa ka fraternity.

Sa pakighinabi sa Banat News ni PO3 Ronald Luna, misaysay nga nakadawat og impormasyon kalabot sa presenya ni Udtohan sa maong dapit.

Tungod niini, ila gilayon nga gi-serve ang Warrant of Arrest sa maong dapit nga gipanguluhan sa ilang hepe nga si Sr. Insp. Jaime Silorio Tolentino apan sa pag-abot sa maong dapit giingong kalit nga mibunot og armas ang suspek ug gipusil si Tolentino.

Tungod niini daling mibawos pagpusil ang mga polis nga maoy nakaingon sa daghang samad pinusilan nga naangkon, patay na kini pag-abot sa Danao District Hospital.

Swerte hinuon si Tolentino kay bisan naigo sa dughan wala makasamad kaniya ang bala gumikan sa gisuot niining bullet proof vest.

“Hapit gyud to si sir (Tolentino) may na lang intawon kay nag-bullet proof siya kay nadughan baya dapit, naungot gani ang bala sa bullet proof,” pasabot pa ni Luna.

Butyag usab ni Luna nga dugay na nilang gipaubos sa surveillance ang suspetsado ug gani sa miaging buwan nagginukoray usab sila tungod kay miikyas man kining suspetsado.

Nasayran nga ang suspetsado adunay warrant of arrest sa kasong rape nga giluwatan ni Branch 56 Mandaue City RTC Judge Teresita Abarquez Galanida kabahin sa nahitabong pagpanglugos niadtong tuig 2010. (BANAT NEWS)